នាព្រឹកថ្ងៃអង្គារ៍ទី០៩ ខែវិច្ឆិកា ឆ្នាំ២០២១ នៅវិមានឯករាជ្យ ឯកឧត្ដម ប៉ែន កុសល្យ អភិបាល នៃគណៈអភិបាលខេត្តឧត្ដរមានជ័យ បានអញ្ជើញដឹកនាំប្រតិភូខេត្ត ថ្នាក់ដឹកនាំមន្រ្តីរាជការ នៃរដ្ឋបាលខេត្តឧត្ដរមានជ័យ អញ្ជើញចូលរួមអបអរសាទរខួបអនុស្សាវរីយ៍ នៃទិវាបុណ្យឯករាជ្យជាតិ លើកទី៦៨ (៩ វិច្ឆិកា ១៩៥៣ - ៩ វិច្ឆិកា ២០២១) នៅបរិវេណសួនច្បារក្រុងសំរោង។

សម្រាប់ពិធីដ៏មហាឱឡារិកនេះ ក៏មានការអញ្ជើញចូលរួមពី ឯកឧត្ដម លោកជំទាវសមាជិកក្រុមប្រឹក្សាខេត្ត អភិបាលរងខេត្ត មន្ទីរ-អង្គភាព កងកម្លាំងប្រដាប់អាវុធទាំងបីប្រភេទ លោកនាយករដ្ឋបាលសាលាខេត្តស្ដីទី-លោកនាយករង ក្រុង-ស្រុកទាំងប្រាំ ក្រុមប្រឹក្សាក្រុង-ស្រុកទាំងប្រាំ មេឃុំ-ចៅសង្កាត់ ព្រមទាំង មន្ដ្រីរាជការជាច្រើនរូបទៀតផងដែរ។

គួររំលឹកដែរថា ថ្ងៃទី៩ វិច្ឆិកា នេះ គឺជាថ្ងៃប្រវត្តិសាស្ត្រដ៏សំខាន់សម្រាប់ប្រទេសកម្ពុជា ដែលទទួលបានឯករាជ្យពេញបរិបូរណ៍ពីអាណានិគមបារាំង នៅក្នុងឆ្នាំ១៩៥៣ ក្រោមព្រះរាជបូជនីយកិច្ចដ៏ឧត្តុង្គឧត្តមរបស់ព្រះករុណា ព្រះបាទសម្ដេច ព្រះនរោត្តម សីហនុ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ «ព្រះបរមរតនកោដ្ឋ» ដែលព្រះអង្គបានលះបង់ទាំងព្រះកាយពល និងព្រះបញ្ញាញាណយ៉ាងក្លៀវក្លាបំផុតក្នុងព្រះរាជបេសកកម្ម ដើម្បីជាតិមាតុភូមិ និងប្រជារាស្ត្រខ្មែរ៕

ប្រភព៖ រដ្ឋបាលខេត្តឧត្តរមានជ័យ