សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដឹកនាំគណៈប្រតិភូជាន់ខ្ពស់របស់ក្រសួងមហាផ្ទៃ អញ្ជេីញមាតុភូមិនិវត្តន៍មកដល់ព្រះរាជាណាចក្រកម្ពុជា នាយប់ថ្ងៃសៅរ៍ ១០រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែមីនា ឆ្នាំ២០១៩ នៅព្រលានយន្តហោះអន្តរជាតិភ្នំពេញ បន្ទាប់ពីសម្ដេចបានបញ្ចប់ដំណើរទស្សនកិច្ចផ្លូវការ នៅសាធារណរដ្ឋប្រជាមានិតចិន ចាប់ពីថ្ងៃទី២៧ដល់ថ្ងៃទី៣០ ខែមីនា ឆ្នាំ២០១៩។
ក្នុងដំណើរទស្សនកិច្ចផ្លុវការរយៈពេល ៤ កន្លងមក សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង ឯកឧត្តម ចាវ ឃើជឺ រដ្ឋមន្ត្រី ក្រសួងសន្តិសុខសាធារណចិន បានវាយតម្លៃខ្ពស់ចំពោះកិច្ចសហប្រតិការយ៉ាងល្អប្រសើររវាងកងកម្លាំងអនុវត្តច្បាប់នៃប្រទេសទាំងពីរក្នុងរយៈពេលកន្លងមក ដែលបានខិតខំបំពេញភារកិច្ចប្រកបដោយការទទួលខុសត្រូវខ្ពស់ ឈលើគោលការណ៍គោរពអធិបតេយ្យភាពស្របតាមច្បាប់នៃប្រទេសរៀងៗខ្លួន និងមិត្តភាពជាភាតរៈរវាងប្រទេសទាំងពីរ។ ក្នុងកំឡុងពេលនៃដំណើរទស្សនកិច្ច ភាគីទាំងពីរបានចុះហត្ថលេខាលើឯកសារសហប្រតិបតិ្តការសំខាន់ៗចំនួន៣ រួមមាន៖
ទី-១ អនុស្សារណៈនៃការយោគយល់គ្នាស្ដីពីការពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងនឹងបទល្មើសឆបោកតាម មធ្យោបាយទូរគមនាគមន៍
ទី-២ ផែនការសកម្មភាពសម្រាប់អនុស្សារណៈនៃការយោគយល់គ្នារវាងក្រសួងមហាផ្ទៃនិងក្រសួងសន្តិសុខសាធារណៈ ០៥ឆ្នាំបន្ត (២០១៩-២០២៤)
ទី-៣ ផែនការការងារសម្រាប់ឆ្នាំនៃកិច្ចសហប្រតិបត្តិការអនុវត្តច្បាប់ឆ្នាំ២០១៩ រវាងក្រសួងមហាផ្ទៃ និងក្រសួងសន្តិសុខសាធារណៈ។
ក្រៅពីជំនួបពិភាក្សាការងារជាមួយថ្នាក់ដឹកនាំក្រសួងសន្តិសុខសាធារណៈ សម្ដេចក្រឡាហោម ស ខេង ឧបនាយកមន្ត្រី រដ្ឋមន្ត្រីក្រសួងមហាផ្ទៃ ក៏បានជួបពិភាក្សាការងារជាមួយនឹងឯកឧត្តម ហ្គ័រ សាំងឃុន សមាជិកការិយាល័យនយោបាយមជ្ឈឹមបក្ស និងជាលេខាគណៈកម្មាធិការកណ្តាលកិច្ចការនយោបាយ និងច្បាប់ នៃបក្សកុម្មុយនីស្តចិន និងឯកឧត្តម ឆិន វិនឈីងសមាជិកគណៈកម្មាធិការមជ្ឈឹមបក្សកុម្មុយនិស្តចិន និងជារដ្ឋមន្រ្តីក្រសួងសន្តិសុខជាតិនៃសាធារណរដ្ឋប្រជាមានិតចិន ដោយភាគីទាំងពីរបានជជែកពិភាក្សាគ្នាអំពីកិច្ចការមួយចំនួនរួមមានការផ្លាស់ប្ដូរប្រតិភូដើម្បីដកបទពិសោធន៍ការងារការបណ្ដុះបណ្ដាលជំនាញបច្ចេកទេសដល់កងកម្លាំងអនុវត្តច្បាប់ និងការវាយតម្លៃការអនុវត្តអនុស្សារណៈនៃការយោគយល់គ្នារវាងក្រសួងទាំងពីរ៕ គឹមអាន
ដោយ៖ នាយកដ្ឋានព័ត៌មានវិទ្យា