នៅព្រឹកថ្ងៃពុធ ទី១៣ ខែមិថុនា ឆ្នាំ២០១៨ម្សិលមិញនេះ ឯកឧត្តម វ៉ា ថន អភិបាលខេត្តក្រចេះ បានអញ្ជើញជាអធិបតី ក្នុងពិធីផ្សព្វផ្សាយសេចក្តីណែនាំរួម ស្ដីពីកិច្ចសហប្រតិបត្តិការ រវាងអាជ្ញាធររដ្ឋបាលថ្នាក់ក្រោមជាតិ និងគណៈកម្មាធិការរៀបចំការបោះឆ្នោតគ្រប់លំដាប់ថ្នាក់ ក្នុងកិច្ចដំណើរការបោះឆ្នោតជ្រើសតាំងតំណាងរាស្រ្តនីតិកាលទី៦ ដែលសមាសភាពអញ្ជើញចូលរួមមាន ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត អភិបាលរងខេត្ត ប្រធានមន្ទីរ-អង្គភាព ជុំវិញខេត្ត មន្ត្រីពាក់ព័ន្ធ អង្គការសង្គមស៊ីវិវិល និងតំណាងគណៈបក្សនយោបាយ ក្រុង-ស្រុក ចំនួនជាង ២០០នាក់ ពិធីនេះបានធ្វើឡើងនៅក្នុងសាលមហោស្របខេត្ត។ ឯកឧត្តម អភិបាលខេត្តក្រចេះ បានលើកឡើងថា កិច្ចផ្សព្វផ្សាយនេះ មានសារៈសំខាន់ណាស់ សម្រាប់អាជ្ញាធរមូលដ្ឋាន កងកម្លំាងមានសមត្ថកិច្ច ទាំងមន្ត្រីរៀបចំការបោះឆ្នោតគណបក្សនយោបាយទាំងអស់ ដែលបានចូលរួមបោះឆ្នោត នៅក្នុងខេត្តក្រចេះ ដែលទាំងអស់គ្នាត្រូវឈរលើស្មារតីច្បាប់ សេចក្តីណែនាំ លិខិតបទដ្ឋានគតិយុទ្ធ ពិសេស សេចក្តីណែនាំរួមចំនួន ៦ចំណុចធំៗ របស់ក្រសួងមហាផ្ទៃ ដើម្បី យកទៅអនុវត្តក្នុងការសម្របសម្រួល ដល់យុទ្ធនាការឃោសនា និងការបោះឆ្នោតជាតិជ្រើសតាំងតំណាងរាស្រ្តអាណត្តិទី០៦ ខាងមុខនេះ ដើម្បី ធានាឱ្យដំណើរការបោះឆ្នោតប្រព្រឹត្តទៅ ដោយរលូនប្រកប់ដោយសេរី ត្រឹមត្រូវ និងយុត្តិធម៌ ។ ឯកឧត្តម អភិបាលខេត្ត បានបញ្ជាក់ថា ដើម្បីធានាឱ្យដំណើរការបោះឆ្នោតប្រព្រឹត្តទៅ ដោយរលូនប្រកបដោយសេរី ត្រឹមត្រូវ និងយុត្តិធម៌នោះ គណៈបញ្ជាការឯកភាពរដ្ឋបាលខេត្ត បានត្រៀមកងកម្លាំងមានសមត្ថកិច្ច រួចជាស្រេច សម្រាប់ការពារនូវសន្តិសុខសុវត្ថិភាពសាធារណៈ នៅក្នុងមូលដ្ឋាន ទាំងក្នុងអំឡុងពេលនេះ រហូតដល់ក្រោយការបោះឆ្នោត ដោយគោរព និងអនុវត្តតាមតួនាទីរបស់ខ្លួន ដែលបានកំណត់ ជាពិសេស គឺក្នុងកំឡុងយុទ្ធនាឃោសនាបោះឆ្នោត ការបោះឆ្នោត ការរាប់សន្លឹកឆ្នោត និងការពារការិយាល័យបោះឆ្នោត ឱ្យបានល្អស្របទៅតាមច្បាប់របស់ គ.ជ.ប និងត្រៀមរៀបចំប្រជុំជាមួយភាគីគណបក្សនយោបាយ ដើម្បី ពិភាក្សាដោះស្រាយរាល់គ្រប់បញ្ហាមុន និងការចាប់ផ្តើមការងាររបស់ខ្លួន ត្រូវសហការជាមួយអាជ្ញាធរគ្រប់លំដាប់ថ្នាក់ ក្នុងមូលដ្ឋានជៀសវាងការប្រព្រឹត្តផ្ទុយពីច្បាប់កំណត់ ។ ឯកឧត្តម វ៉ា ថន ក៏បានអំពាវនាវ និងសំណូមពរដល់អាជ្ញាធរ កងកម្លំាងមានសមត្ថកិច្ចគ្រប់លំដាប់ថ្នាក់ ត្រូវបង្កលក្ខណៈងាយស្រួល ព្រមទាំង ផ្តល់នូវកិច្ចសហប្រតិបត្តិការល្អប្រសើរ ទៅដល់គណបក្សនយោបាយនានា ក្នុងការធ្វើសកម្មភាពនយោបាយរបស់ខ្លួន ដោយស្របច្បាប់ និងស្របតាមគោលការណ៍ នៃការណែនាំ របស់ គ.ជ.ប ជាពិសេស ការយកិត្តទុកដាក់ លើកិច្ចការពារសន្តិសុខ សុវត្តិភាព ដល់គណបក្សនយោបាយនានា ក្នុងការឃោសនាស្វែងរកសម្លេងឆ្នោត ចាប់ពីថ្ងៃទី០៧ ខែកក្កដា ដល់ ថ្ងៃទី២៧ ខែកក្កដា ឆ្នាំ២០១៨ ខាងមុខ ។ ទន្ទឹមនឹងនោះដែរ អាជ្ញាធរមូលដ្ឋានគ្រប់លំដាប់ថ្នាក់ ក៏ត្រូវអប់រំទៅដល់បងប្អូនប្រជាពលរដ្ឋ ដែលមានឈ្មោះ ក្នុងបញ្ជីឈ្មោះបោះឆ្នោត សូមទៅចូលរួមបោះឆ្នោតជ្រើសរើស តំណាងរាស្ត្រអាណត្តិទី៦ ឱ្យបានគ្រប់ៗគ្នា ៕ គួររលឹកដែរថា ខេត្តក្រចេះមានប្រជាពលរដ្ឋ ដែលគ្រប់អាយុមានសិទ្ឋចូលរួមបោះឆ្នោត នៅថ្ងៃទី២៩កក្តដា ២០១៨ខាងមុខនេះមានចំនួន សរុប ១លាន់ ៨មុឺន ៩ពាន់ ៨០៣នាក់ ក្នុងមានស្រីចំនួន ៩មុឺន ៧ពាន់ ៥៤៨នាក់៕ ប្រភពព័ត៌មាន: រដ្ឋបាលខេត្តក្រចេះ (ថ្ងៃទី១៤ ខែមិថុនា ឆ្នាំ២០១៨)
