ថ្ងៃព្រហស្បត្តិ៍ ២កើត ខែបឋមសាធ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៤ ខែមិថុនា ឆ្នាំ២០១៨ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីដ៏ខ្ពង់ខ្ពស់ ក្នុងពិធីដុតកម្ទេចចំណីអាហារ ខូចគុណភាព-ខុសច្បាប់ ដោយមានសារធាតុគីមី ជាង១០០តោន នៅភូមិថ្មីពីងពុង ឃុំដំណាក់រាំង ស្រុកឧដ្តុង្គ ខេត្តកំពង់ស្ពឺ ដែលការចូលរួម ពីសំណាក់ថ្នាក់ដឹកនាំ ក្រសួងពាក់ព័ន្ធ តំណាងអង្គទូត ស្ថាប័នតុលាការ អង្គភាពនានា អាជ្ញាធរដែនដី គ្រប់ជាន់ថ្នាក់ និងវិស័យឯកជន និងប្រជាពលរដ្ឋផងដែរ ។ ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានអានរបាយការណ៍កាលពីថ្ងៃទី១២ ខែមិថុនា ចំណីអាហារខូចគុណភាព-ខុសច្បាប់ដោយមានសារធាតុគីមីទាំងនេះ ត្រូវបានសមត្ថកិច្ចចម្រុះ នៃគណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម សហការជាមួយស្នងការនគរបាលខេត្ត បានបង្ក្រាប និងរឹបអូសពីជនល្មើស ដែលចរាចរ ស្តុកទុក ផលិត និងចែកចាយខុសច្បាប់ នាពេលកន្លងមក។ ការកម្ទេចផលិតផលចំណីអាហារខូចគុណភាព ខុសច្បាប់ ដែលមានសារធាតុគីមីប៉ះពាល់ ដល់សុខភាព ទាំង ត្រូវបានអនុវត្តតាមការបង្គាប់ របស់តុលាការ ឲ្យធ្វើការកម្ទេចចោល ។ នាយឧត្តមសេនីយ៍ មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ បានឱ្យដឹងថា ទំនិញខុសច្បាប់ចំនួន ១៦មុខ ទម្ងន់ជាង ១០០តោននេះ គឺត្រូវបង្រ្កាបបានក្នុងអំឡុងខែវិច្ឆិកា ឆ្នាំ២០១៧។ ការចុះបង្ក្រាបនេះ ធ្វើឡើងដោយសមត្ថកិច្ចចម្រុះដឹកនាំដោយគណៈកម្មាធិការប្រយុទ្ធប្រឆាំងផលិតផលក្លែងក្លាយ នៅទីតាំងសិប្បកម្មកែច្នៃស្រោមសាច់ក្រកខុសច្បាប់ ១កន្លែង នៅភូមិថ្មីពីងពុង ឃុំដំណាក់រាំង ស្រុកឧដុង្គ ដែលមានម្ចាស់ឈ្មោះ វីង ហ៊ុយ ភេទប្រុស អាយុ ៣៨ឆ្នាំ (គេចខ្លួន)។ ប្រធានគណៈកម្មាធិការនេះ បានបញ្ជាក់ថា នេះគឺជាលើកទី៣ហើយ បន្ទាប់ពីបានធ្វើពិធីកម្ទេចគ្រឿងសម្អាងក្លែងក្លាយ-ខុសច្បាប់ ២លើកកន្លងទៅថ្មីៗនេះ ដែលមានចំនួនសរុបប្រមាណជាង ១៦០តោន។ សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានធ្វើកាតសរសើរដល់ គណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ អាជ្ញាធរដែនដី កម្លាំងចម្រុះដែលបានសហការគ្នាបានយ៉ាងល្អ ឈានទៅការរឹបអូសស្វែងរកទំនិញខូចគុណភាព មកធ្វើពិធីកម្ទេចចោលនាពេលនេះ ។ ផលិតផលចំណីអាហារហួសកាលបរិច្ឆេទ និងទំនិញហាមឃាត់វាធ្វើឲ្យប៉ះពាល់ដល់សុខភាពអ្នកទទួលទាន ប្រជាពលរដ្ឋ ពិសេសសិស្សានុសិស្សដែលមានអនាគតនៅវែងឆ្ងាយ និងជាទំពាំងស្នងឫស្សី នៃប្រទេសជាតិ សម្ដេចក៏បានជម្រុញបន្ថែមទៅដល់ ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ អាជ្ញាធរគ្រប់លំដាប់ថ្នាក់ត្រូវទប់ស្កាត់ការធ្វើចរាចរផលិតផលខ្វះអនុលោមភាពតាមបទបញ្ញត្ត រឺបទដ្ឋានបច្ចេកទេស ដែលបង្កឲ្យមានគ្រោះថ្នាក់ដល់សុខមាលភាពប្រជាពលរដ្ឋ រួមចំណែកបង្កើនគុណភាព សុវត្ថិភាព ផលិតផលចំណីអាហារ ដែលផលិតក្នុង និងក្រៅស្រុក ។ ជាចុងក្រោយសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអំពាវដល់ប្រជាពលរដ្ឋទាំងអស់សូមកុំភ្លេចទៅបោះឆ្នោត នៅថ្ងៃទី ២៩ ខែកក្កដា ឆ្នាំ២០១៨ ដើម្បីជ្រើសរើសតំណាងរាស្រ្តដែលខ្លួនពេញចិត្ត ដោយសេរី ត្រឹមត្រូវ និតយុត្តិធម ហើយកុំជឿរតាមជនអគតិមួយចំនួនតូច ដែលបានញុះញង់រារាំងប្រជាពលរដ្ឋមិនេះអោយចួលរួមបោះឆ្នោតជាដាច់ខាត ៕
