សព្វថ្ងៃនេះ មនុស្សភាគច្រើនប្រហែលជាធ្លាប់បានលឺ ឬស្គាល់ពាក្យថា ឌីជីថល ហើយដោយវាគឺជាពាក្យបច្ចេកទេស នៃបច្ចេកវិទ្យាជំនាន់ចុងក្រោយមួយដែលមនុស្សកំពុងប្រើប្រាស់ក្នុងពេលបច្ចុប្បន្ន។

ចុះអ្វីគឺ អក្ខរកម្មឌីជីថល និងគម្លាតឌីជីថល?

អក្ខរកម្មឌីជីថល គឺសំដៅលើធនធានមនុស្សដែលមានលទ្ធភាព និងសមត្ថភាពក្នុងការប្រើប្រាស់បច្ចេកវិទ្យាសម្រាប់ការរស់នៅប្រចាំថ្ងៃ ដូចជាការប្រើប្រាស់អុីនធឺណិត កុំព្យូទ័រ ទូរស័ព្ទឆ្លាតវៃ កម្មវិធីទំនាក់ទំនង បណ្តាញសង្គម និងបច្ចេកវិទ្យាជឿនលឿនដ៏ទៃទៀតជាច្រើន។ ចំណែក គម្លាតឌីជីថល គឺជាការបែងចែករវាងអ្នកដែលមានចំណេះដឹងក្នុងការប្រើប្រាស់ និងស្វែងយល់ពីបច្ចេកវិទ្យាឌីជីថល និងអ្នកដែលមិនមានចំណេះដឹងពីវិស័យនេះ ដែលភាគច្រើនជាអ្នកដែលរស់នៅតាមទីដាច់ស្រយាល ឫអ្នកដែលមិនមានលទ្ធភាពក្នុងការប្រើប្រាស់។

ជាមួយការតាមដានការប្រែប្រួលនៃគម្លាតឌីជីថល គេអាចដឹងពីកម្រិត នៃការយល់ដឹងរបស់មនុស្សពីបច្ចេកវិទ្យាឌីជីថល ខណៈដែលបច្ចុប្បន្ន វិស័យនេះបានក្លាយជាកត្តាចម្បងមួយក្នុងការជំរុញដំណើរអភិវឌ្ឍន៍ នៃប្រទេសនានានៅជុំវិញពិភពលោក។

ចាប់តាំងពីការផ្គត់ផ្គង់ប្រព័ន្ធអ៊ីនធឺណិតមានភាពទូលំទូលាយ ហើយស្របគ្នានឹងការរីកចម្រើន នៃបច្ចេកវិទ្យាផងដែរនោះ គម្លាតឌីជីថលទាំងនៅកម្ពុជា និងនៅទូទាំងពិភពលោក បានចាប់ផ្តើមមានការប្រែប្រួលយ៉ាងឆាប់រហ័ស។ លើសពីនេះ វិបត្តិជំងឺរាតត្បាតកូវីដ-១៩ ក៏បានធ្វើឲ្យគម្លាតនេះកាន់តែមានការប្រែប្រួលគួរឱ្យកត់សម្គាល់ផងដែរ ដោយសារមនុស្សត្រូវបានតម្រូវឱ្យរស់នៅដាច់ដោយឡែកពីគ្នា និងប្រើប្រាស់បច្ចកវិទ្យាក្នុងការប្រាស្រ័យទាក់ទងជំនួសឱ្យការធ្វើទំនាក់ទំនងដោយផ្ទាល់។

ការបង្រួមគម្លាតឌីជីថល បានជួយជំរុញដល់ការអភិវឌ្ឍប្រទេស លើកកម្ពស់សេដ្ឋកិច្ច ព្រមទាំងការរស់នៅរបស់ប្រជាជន ហើយវាបានក្លាយជាគោលដៅដ៏សំខាន់មួយដែលប្រទេសនានាកំពុងខិតខំជំរុញ ដើម្បីដើរឱ្យទាន់ការវិវត្តនៃបដិវត្តន៍ឧស្សាហកម្មទី៤។

យ៉ាងណាមិញ ក្រៅពីអត្ថប្រយោជន៍នៃការប្រើប្រាស់ បច្ចេកវិទ្យាក៏មានហានិភ័យដែលគួរប្រុងប្រយ័ត្នផងដែរ។ វាតម្រូវឱ្យអ្នកប្រើប្រាស់មានចំណេះដឹង និងសមត្ថភាពគ្រប់គ្រាន់ក្នុងការប្រើប្រាស់ប្រកបដោយប្រសិទ្ធិភាព សុវត្ថិភាព និងទំនួលខុសត្រូវ ព្រោះនៅក្នុងពិភពអនឡាញ ព័ត៌មានដែលអ្នកប្រើប្រាស់ទទួលបាន ពេលខ្លះអាចជាព័ត៌មានក្លែងក្លាយ ជាការយល់ច្រឡំ ឬជាការបោកបញ្ឆោត ដែលអាចបណ្តាលឱ្យរងការខាតបង់នានា។

ប្រសិនបើគម្លាតឌីជីថលមានការអភិវឌ្ឍប្រកបដោយភាពវិជ្ជមាន វាបង្ហាញថាប្រជាជនច្រើនឡើងកាន់តែមានការយល់ដឹងពីវិស័យនេះ ហើយវានឹងជួយជម្រុញការរីកចម្រើននៃសង្គម ឬប្រទេសមួយប្រកបដោយភាពជឿនលឿន និងមានសក្តានុពល៕

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ