តាកែវ៖ នៅក្នុងជំនួបសម្ដែងការគួរសម និងពិភាក្សាការងារជាមួយគណៈប្រតិភូគណៈកម្មការទី៣ នៃរដ្ឋសភា នាព្រឹកថ្ងៃអង្គារ ទី២៣ ខែមិថុនា ឆ្នាំ២០២៦ នេះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានជម្រាបជូនគណៈប្រតិភូថា ខេត្តតាកែវ គឺជាខេត្តមួយ ដែលមានសន្តិសុខ សណ្តាប់ធ្នាប់សង្គមល្អប្រសើរ ដោយគ្មានបទល្មើសឆបោកតាមប្រព័ន្ធអនឡាញ (Online Scams) អំពើឆក់ប្លន់ ឬការចាប់ជំរិតនោះឡើយ។ កត្តាស្ថិរភាព និងសុវត្ថិភាពដ៏រឹងមាំនេះហើយ ដែលបាននិងកំពុងទាក់ទាញចិត្តវិនិយោគិនកាន់តែច្រើនឡើង ឱ្យចូលមកបណ្ដាក់ទុនរកស៊ីនៅក្នុងខេត្តតាកែវយ៉ាងកំហុក។

ឯកឧត្តម វ៉ី សំណាង អភិបាលខេត្ត បានថ្លែងបន្តជូនគណៈកម្មការទី៣ នៃរដ្ឋសភាថា គិតត្រឹមឆ្នាំ២០២៥ កន្លងទៅ ចំនួនរោងចក្រ សហគ្រាស នៅក្នុងខេត្តតាកែវ មានការកើនឡើងយ៉ាងខ្លាំងរហូតដល់ទៅជាង ៣០០ភាគរយ។ គិតមកទល់ពេលនេះ ខេត្តតាកែវមានរោងចក្រ សហគ្រាស សរុបជាង ១,១០០ មូលដ្ឋាន ដែលបានបង្កើតឱកាសការងារជូនបងប្អូនប្រជាពលរដ្ឋបានចំនួនជាង ១៦ម៉ឺននាក់។ ដោយឡែក សម្រាប់តែក្នុងរយៈពេលដើមឆ្នាំ ២០២៦ នេះ មានរោងចក្រថ្មីៗចំនួន ១៥ បន្ថែមទៀត បានមកបើកដំណើរការជាបន្តបន្ទាប់នៅក្នុងខេត្ត។

មានប្រសាសន៍នៅក្នុងឱកាសនោះ ឯកឧត្តម ឡូយ សុផាត ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា (គណៈកម្មការទី៣) បានសម្ដែងការកោតសរសើរយ៉ាងក្រៃលែង ចំពោះការដឹកនាំរបស់ថ្នាក់ដឹកនាំខេត្ត មន្ត្រីរាជការ និងសមត្ថកិច្ចពាក់ព័ន្ធទាំងអស់ ដែលបានខិតខំប្រឹងប្រែង  អភិវឌ្ឍខេត្តតាកែវ ឱ្យមានការរីកចម្រើនយ៉ាងលឿនហួសពីការរំពឹងទុក ជាពិសេសគឺកំណើនរោងចក្រ សហគ្រាស ដ៏ខ្ពស់ត្រដែត។ ឯកឧត្តមប្រធានគណៈកម្មការ បានគូសបញ្ជាក់បន្ថែមថា ខេត្តតាកែវ នឹងក្លាយជាខេត្តដែលមានសក្ដានុពលសេដ្ឋកិច្ចកាន់តែខ្លាំងក្លាថែមទៀត ក្រោយពេលដែលគម្រោង «ព្រែកជីកហ្វូណនតេជោ» ត្រូវបានសាងសង់រួចរាល់ជាស្ថាពរក្នុងពេលឆាប់ៗខាងមុខនេះ៕

ប្រភព៖ រដ្ឋបាលខេត្តតាកែវ