សៀមរាប ៖ នៅព្រឹកថ្ងៃសុក្រ ទី១០ ខែកក្កដា ឆ្នាំ២០២៦ ដោយអនុវត្តតាមបទបញ្ជា និងការណែនាំដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ ក្នុងគោលបំណងត្រៀមកម្លាំងឱ្យមានភាពរួចរាល់ក្នុងការឆ្លើយតបចំពោះគ្រោះអាសន្ន និងគ្រោះមហន្តរាយដែលអាចកើតមានជាយថាហេតុ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានអញ្ជើញដឹកនាំកម្លាំងនគរបាលប្រមូលផ្តុំ ដើម្បីត្រៀមអន្តរាគមន៍ និងសង្គ្រោះបងប្អូនប្រជាពលរដ្ឋពីគ្រោះមហន្តរាយនានា។

ក្នុងឱកាសនោះដែរ លោកឧត្តមសេនីយ៍ទោ ស្នងការ បានធ្វើការត្រួតពិនិត្យកម្លាំង សម្ភារៈ និងមធ្យោបាយប្រតិបត្តិការពាក់ព័ន្ធ ព្រមទាំងណែនាំដល់កងកម្លាំងទាំងអស់ឱ្យត្រៀមខ្លួនជានិច្ច ដោយឈរលើស្មារតីទទួលខុសត្រូវខ្ពស់ រក្សាវិន័យ និងសហការយ៉ាងជិតស្និទ្ធជាមួយអាជ្ញាធរមូលដ្ឋាន និងស្ថាប័នពាក់ព័ន្ធ ដើម្បីអន្តរាគមន៍បានទាន់ពេលវេលា ការពារអាយុជីវិត ទ្រព្យសម្បត្តិ និងកាត់បន្ថយផលប៉ះពាល់ដល់ប្រជាពលរដ្ឋ។

សកម្មភាពនេះបានបង្ហាញពីការត្រៀមខ្លួនរួចជាស្រេចរបស់ស្នងការដ្ឋាននគរបាលខេត្តសៀមរាប ក្នុងការបំពេញភារកិច្ចបម្រើ និងការពារប្រជាពលរដ្ឋ ដោយស្មារតីទទួលខុសត្រូវ និងឆ្លើយតបប្រកបដោយប្រសិទ្ធភាពចំពោះគ្រប់ស្ថានការណ៍គ្រោះអាសន្ន និងគ្រោះមហន្តរាយដែលអាចកើតមាន៕

ប្រភព៖ ស្នងការដ្ឋាននគរបាលខេត្តសៀមរាប