ចិន៖ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ និងឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ បានដឹកនាំគណៈប្រតិភូអញ្ជើញបំពេញទស្សនកិច្ចសិក្សា និងដកស្រង់បទពិសោធន៍លើការអនុវត្តបច្ចេកវិទ្យាឌីជីថលក្នុងវិស័យពន្ធនាគារនៅទីស្នាក់ការក្រុមហ៊ុន China-ASEAN Information Harbor នៅទីក្រុងណាននីង ខេត្តក្វាងស៊ី សាធារណរដ្ឋប្រជាមានិតចិន នៅថ្ងៃទី៣ ខែមិថុនា ឆ្នាំ២០២៦។

ក្នុងឱកាសនោះ គណៈប្រតិភូ បានអញ្ជើញស្តាប់ការធ្វើបទបង្ហាញបច្ចេកវិទ្យាឌីជីថល និងសិក្សាស្វែងយល់អំពីប្រព័ន្ធពន្ធនាគារឆ្លាតវៃ (Smart Prison) ដែលបានដាក់បញ្ចូលបច្ចេកវិទ្យាទំនើបសម្រាប់ការគ្រប់គ្រងពន្ធនាគារតាមប្រព័ន្ធឌីជីថល ការគ្រប់គ្រងទិន្នន័យឌីជីថល ការត្រួតពិនិត្យសន្តិសុខឆ្លាតវៃ ដើម្បីបង្កើនប្រសិទ្ធភាព និងសុវត្ថិភាពក្នុងការគ្រប់គ្រងពន្ធនាគារ។

ជាមួយគ្នានេះ គណៈប្រតិភូ ក៏បានជួបពិភាក្សា និងផ្លាស់ប្តូរបទពិសោធន៍ជាមួយថ្នាក់ដឹកនាំ និងអ្នកជំនាញបច្ចេកទេសរបស់ក្រុមហ៊ុន China-ASEAN Information Harbor ដោយផ្តោតលើឱកាសក្នុងការអភិវឌ្ឍប្រព័ន្ធគ្រប់គ្រងព័ត៌មាន ការប្រើប្រាស់បច្ចេកវិទ្យាឌីជីថលក្នុងការពង្រឹងការងារសន្តិសុខ និងការលើកកម្ពស់ប្រសិទ្ធភាពនៃការគ្រប់គ្រងពន្ធនាគារ ស្របតាមផែនការយុទ្ធសាស្ត្ររបស់រាជរដ្ឋាភិបាល។

ទស្សនកិច្ចសិក្សានេះ បានផ្តល់ឱកាសដ៏មានតម្លៃដល់គណៈប្រតិភូក្រសួងមហាផ្ទៃ ក្នុងការស្វែងយល់ពីបទពិសោធន៍ជាក់ស្តែង និងបច្ចេកវិទ្យាទំនើប ដែលអាចយកមកធ្វើជាមូលដ្ឋានសម្រាប់ការសិក្សា និងពិចារណាក្នុងការអភិវឌ្ឍប្រព័ន្ធគ្រប់គ្រងពន្ធនាគារនៅកម្ពុជាឱ្យកាន់តែទំនើប៕