ទីស្ដីការក្រសួងមហាផ្ទៃ៖ នាព្រឹកថ្ងៃទី១២ ខែវិច្ឆិកា ឆ្នាំ២០២៥ លោកជំទាវ អុង សុភាវី រដ្ឋលេខាធិការ និងជាប្រធានក្រុមការងារយេនឌ័រក្រសួងមហាផ្ទៃ បានអញ្ជើញជាអធិបតី ក្នុងពិធីប្រកាសសមាសភាពក្រុមការងារយេនឌ័រនៃសាលាជាតិរដ្ឋបាលមូលដ្ឋាន ។

ពិធីនេះមានការអញ្ជើញចូលរួមពី លោកជំទាវ អនុរដ្ឋលេខាធិការ ឯកឧត្ដម នាយកសាលាជាតិរដ្ឋបាលមូលដ្ឋានក្រសួងមហាផ្ទៃ លោកស្រី នាយករង សាលាជាតិរដ្ឋបាលមូលដ្ឋានក្រសួងមហាផ្ទៃ ប្រធាន អនុប្រធាននាយកដ្ឋាន និងលោក លោកស្រី ជាសមាជិក សមាជិកា ជាមន្រ្តីរាជការ ចំណុះសាលាជាតិរដ្ឋបាលមូលដ្ឋានក្រសួងមហាផ្ទៃ ជាច្រើនរូបផងដែរ។

ជាកិច្ចចាប់ផ្តើម លោកជំទាវ ជី ច័ន្ទរស្មី នាយករង និងជាប្រធានក្រុមការងារយេនឌ័រសាលាជាតិរដ្ឋបាលមូលដ្ឋានក្រសួងមហាផ្ទៃ បានធ្វើសេចក្តីរាយការណ៍សង្ខេប ស្តីពីរបាយការណ៍ការអនុវត្តការងារយេនឌ័រ របស់សាលាជាតិរដ្ឋបាលមូលដ្ឋាន និងមានការអានសេចក្តីសម្រេច ស្តីពីការបង្កើតក្រុមការងារយេនឌ័រនៃសាលាជាតិរដ្ឋបាលមូលដ្ឋាន ដោយលោកស្រី ម៉ៅ ម៉ាលីស ជូនដល់អង្គពិធីបានជ្រាបផងដែរ ។

ក្នុងនោះដែរ លោកជំទាវ រដ្ឋលេខាធិការ និងជាប្រធានក្រុមការងារយេនឌ័រក្រសួងមហាផ្ទៃ បានសម្តែងនូវការកោតសរសើរ និងវាយតម្លៃខ្ពស់ ជូនដល់ថ្នាក់ដឹកនាំ និងមន្រ្តីសាលាជាតិរដ្ឋបាលមូលដ្ឋានទាំងអស់ ដែលបានខិតខំប្រឹងប្រែង បំពេញតួនាទីភារកិច្ចរបស់ខ្លួន បានយ៉ាងល្អជាច្រើននាពេលកន្លងមក។

ឆ្លៀតក្នុងឱកាសនោះលោកជំទាវ រដ្ឋលេខាធិការ ក៏បានផ្ដល់នូវអនុសាសន៍ណែនាំជូនដល់ថ្នាក់ដឹកនាំ និងមន្រ្តីរាជការ ចំណុះសាលាជាតិរដ្ឋបាលមូលដ្ឋាន សូមបន្តជំរុញការចូលរួមឱ្យកាន់តែសកម្មបន្ថែមទៀត ក្នុងការអនុវត្តសមភាពយេនឌ័រ និងការចូលរួមរបស់ស្ត្រីនៅក្នុងការគ្រប់គ្រងមូលដ្ឋាន និងការបន្តកិច្ចសហការណ៍ល្អជាបន្តជាមួយលេខាធិការដ្ឋានយេនឌ័រក្រសួងមហាផ្ទៃ និងគ្រប់ភាគីពាក់ព័ន្ធនានា ដោយបានបន្ថែមពីសារៈសំខាន់នៃការផ្តល់ឱកាសស្មើគ្នារវាងបុរស និងស្ត្រី ក្នុងការចូលរួមការងាររដ្ឋបាលមូលដ្ឋាន និងការពង្រឹងសមត្ថភាពដឹកនាំរបស់ស្ត្រីឱ្យកាន់តែរឹងមាំ។

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ