បន្ទាយមានជ័យ ៖ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ព្រមជាមួយថ្នាក់ដឹកនាំនៃស្នងការនគរបាលខេត្តបន្ទាយមានជ័យ បានអញ្ជើញជាអធិបតីក្នុងពិធី បិទវគ្គបំប៉នជំនាញរយៈពេលខ្លី ស្ដីពី តួនាទី ភារកិច្ច របស់ប៉ុស្តិ៍នគរបាលរដ្ឋបាលដល់់មន្ត្រីនគរបាលប៉ុស្តិ៍រដ្ឋបាល នៅស្នងការដ្ឋាននគរបាលខេត្តបន្ទាយមានជ័យ។ ពិធីនេះមានការអញ្ជើញចូលរួមពី លោកប្រធាន អនុប្រធានសេនាធិការ, ប្រធាន-អនុប្រធាននាយកដ្ឋានសរុបផែនការ, ប្រធាន-អនុប្រធាននាយកដ្ឋានកិច្ចការប៉ុស្តិ៍នគរបាលរដ្ឋបាល, លោកស្នងការរង នាយការិយាល័យ លោកអធិការ-អធិការរងក្រុងស្រុកទាំង៩ និងសិក្ខាកាមសរុបចំនួន ១៣៥នាក់ (ស្រី២៦នាក់)។
លោកឧត្តមសេនីយ៍ត្រី រ៉ែម វីរៈ ស្នងការស្តីទី ស្នងការដ្ឋាននគរបាលខេត្តបន្ទាយមានជ័យ បានរាយការណ៍សង្ខេបអំពីការងារបណ្តុះបណ្តាល ដោយបញ្ជាក់ថា៖ស្នងការដ្ឋាននគរបាលខេត្តបន្ទាយមានជ័យ បានចាត់បញ្ជូនសិក្ខាកាមចូលរួមវគ្គបណ្តុះបណ្តាលក្នុងនោះ៖
១/-វគ្គក្រៅប្រទេស៖(វៀតណាម)ចំនួន២២វគ្គសិក្ខាកាមចំនួន៥១នាក់ ស្រី៣នាក់។២/-វគ្គសិក្សានៅក្នុងប្រទេសមាន៖សិក្សានៅបណ្ឌិតសភានគរបាលចំនួន៧វគ្គសិក្ខាកាមចំនួន២៤នាក់, វគ្គសិក្ខានៅសាលានគរបាលជាតិភូមិភាគ៤ចំនួន២វគ្គសិក្ខាកាមចំនួន៨៣នាក់ ស្រី៥នាក់,វគ្គសិក្សានៅសាលានគរបាលជាតិមិត្តភាពកម្ពុជា-វៀតណាម ចំនួន៨វគ្គ សិក្ខាកាមចំនួន២៣នាក់,សិក្សានៅសាលាហ្វឹកហ្វឺនជំនាញនគរបាលការពារព្រំដែនគោកចំនួន១វគ្គសិក្ខាកាមចំនួន២៤នាក់ ។ ៣/-វគ្គបណ្តុះបណ្តាលនៅនឹងស្នងការដ្ឋាន៖ចំនួន៣វគ្គសិក្ខាកាមចំនួន១០៥នាក់និងវគ្គហ្វឹកហ្វឺនជំនាញនៅបញ្ជាការដ្ឋានងរាជអាវុធហត្ថខេត្ត១វគ្គសិក្ខាកាមចំនួន៤៧នាក់ ។
ជាមួយគ្នានោះដែរ កាលពីថ្ងៃទី២២ ខែមិថុនា ឆ្នាំ២០២៤ដោយអនុវត្តតាមផែនការលេខ១៥០ ផក ចុះថ្ងៃទី១១ ខែមិថុនា ឆ្នាំ២០២៤ របស់អគ្គស្នងការនគរបាលជាតិ ស្តីពីការរៀបចំវគ្គបំប៉នការងារដឹកនាំដល់ស្នងការរងនៃស្នងការដ្ឋាននគរបាលរាជធានី-ខេត្ត ។ ស្នងការដ្ឋាននគរបាលខេត្តបន្ទាយមានជ័យបានរៀបចំពិធីបើកវគ្គបំប៉នការងារដឹកនាំដល់ស្នងការរងនៃស្នងការដ្ឋានមកពី៤ខេត្តគឺ ខេត្តបន្ទាយមានជ័យ,បាត់ដំបង,ពោធិសាត់,និងខេត្តប៉ៃលិនដែលមានសិក្ខាកាមជាស្នងការរងសរុបចំនួន១០២នាក់ ។
លោកឧត្តមសេនីយ៍ទោ មាស លឹមតុង ប្រធាននាយកដ្ឋានកិច្ចការប៉ុស្តិ៍រដ្ឋបាល បានធ្វើសេចក្តីរាយការណ៍អំពីការងារសិក្សាតាមកម្មវិធីដែលបានគ្រោងទុកដោយចាប់ពីថ្ងៃទី២២ ខែកក្កដា ដល់ ថ្ងៃទី០២ ខែសីហា ឆ្នាំ២០២៤ មានសិក្ខាកាមចូលរួមសរុបចំនួន១៦១នាក់ ស្រី៣៣នាក់ ក្នុងនោះមន្ត្រីមកពីការិយាល័យជំនាញចំនួន២៦នាក់ ស្រី៧នាក់និងមន្ត្រីនគរបាលប៉ុស្តិ៍រដ្ឋបាល១៣៥នាក់ ស្រី២៦នាក់ ជាមួយនោះតាមមុខវិជ្ជារៀនមួយចំនួនក៏មានលោកស្នងការរង ថ្នាក់ការិយាល័យនិងថ្នាក់អធិការចូលរួមចំនួន២៣៤នាក់ ស្រី ៨នាក់។
ឯកឧត្តម ឧត្តមសេនីយ៍ឯក ឆាយ គឹមខឿន បានមានប្រសាសន៍ កោតសរសើរដល់ ស្នងការដ្ឋាននគរបាលខេត្តបន្ទាយមានជ័យ ដែលបានខិតខំប្រឹងប្រែងក្នុងការថែរក្សាសន្តិសុខ សុវត្ថិភាព រៀបចំសណ្ដាប់ធ្នាប់សាធារណៈ ជូនបងប្អូនប្រជាពលរដ្ឋ និងការអភិវឌ្ឍអង្គភាព អង្គភាពចំណុះ រួមនិងការបើកវគ្គបំប៉នរយៈពេលខ្លី ខាងលើជូនដល់ មន្ត្រីនគរបាលរដ្ឋបាល គួរជាទីមោទនៈ។ មន្ត្រីនគរបាលទាំងអស់ដែលបានចូលរៀនវគ្គបំប៉នខាងលើ ត្រូវយកចំណេះដឹងទាំងនោះ ទៅអនុវត្តផ្ទាល់ បម្រើការងារជូនអង្គភាពខ្លួន និងបងប្អូនប្រជាពលរដ្ឋ ឲ្យបានកាន់តែល្អប្រសើរ និងមានទំនាក់ទំនងល្អ ជាមួយពួកគាត់។
ទន្ទឹមគ្នានោះឯកឧត្តម ក៏បានក្រើនរំលឹកដល់កងកម្លាំងនគរបាលទាំងអស់ត្រូវបន្តស្វែងយល់បន្ថែម ពិសេសចំណេះដឹងផ្នែកពត៌មានវិទ្យា ពង្រឹងទប់ស្កាត់ បង្ក្រាបបទល្មើសព្រហ្មទណ្ឌគ្រប់ប្រភេទ និងត្រូវពង្រឹងការងារភូមិឃុំសង្កាត់មានសុវត្ថិភាព ព្រោះការអនុវត្តគោលនយោបាយភូមិ ឃុំ សង្កាត់ មានសុវត្ថិភាព បានល្អប្រសើរ នាំឲ្យមូលដ្ឋានរបស់យើងគ្មានបទល្មើស គ្មានអំពើលួច ឆក់ ប្លន់ជាដើម ៕
ប្រភព៖ ស្នងការដ្ឋានខេត្តបន្ទាយមានជ័យ
