ទីស្តីការក្រសួងមហាផ្ទៃ៖ នៅព្រឹកថ្ងៃពុធ ទី៨ ខែកក្កដា ឆ្នាំ២០២៦ នេះ ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ បានអញ្ជើញដឹកនាំកិច្ចប្រជុំ ពិនិត្យវឌ្ឍនភាពរៀបចំមជ្ឈមណ្ឌលបញ្ជាការសមាហរណកម្មក្រសួងមហាផ្ទៃ។ កិច្ចប្រជុំនេះ មានការអញ្ជើញចូលរួមពីថ្នាក់ដឹកនាំ និងមន្ត្រីបច្ចេកទេសពាក់ព័ន្ធ នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ផងដែរ។

មានប្រសាសន៍ក្នុងឱកាសនោះ ឯកឧត្តម ឧត្តមសេនីយ៍ឯក ហោ សំអាត បានបញ្ជាក់ថា កិច្ចប្រជុំនេះរៀបចំឡើងក្នុងគោលបំណងស្តាប់នូវរបាយការណ៍វឌ្ឍនភាពនៃការសាងសង់ ព្រមទាំងការដំឡើងឧបករណ៍សម្ភារ និងប្រព័ន្ធបច្ចេកវិទ្យា។ ទន្ទឹមនឹងនោះ អង្គប្រជុំក៏បានរួមគ្នាពិនិត្យ ពិភាក្សា និងផ្តល់ធាតុចូលបន្ថែម ដើម្បីជំរុញឱ្យការបង្កើតមជ្ឈមណ្ឌលនេះសម្រេចបានជោគជ័យក្នុងពេលឆាប់ៗ ក្នុងគោលដៅបម្រើដល់ការងារប្រចាំថ្ងៃឱ្យកាន់តែមានប្រសិទ្ធភាព។

ឯកឧត្តម ឧត្តមសេនីយ៍ឯក អគ្គនាយក ក៏បានជំរុញ និងណែនាំដល់ថ្នាក់ដឹកនាំ ព្រមទាំងមន្ត្រីជំនាញពាក់ព័ន្ធទាំងអស់ ត្រូវបន្តពង្រឹងកិច្ចសហការ និងសិក្សាបន្ថែមលើផ្នែកបច្ចេកទេស ធ្វើយ៉ាងណាឱ្យការរៀបចំរចនាសម្ព័ន្ធអគារ និងការបំពាក់ប្រព័ន្ធបច្ចេកវិទ្យាទំនើបៗនៅក្នុងមជ្ឈមណ្ឌលនេះ ឱ្យដំណើរការទៅបានលឿន រហ័ស និងទាន់ពេលវេលាស្របតាមផែនការដែលបានគ្រោងទុក។

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ