ឥណ្ឌូណេស៊ី៖ នៅថ្ងៃទី១២ ខែមិថុនា ឆ្នាំ២០២៦នេះ ឯកឧត្តម អ៊ុំ ម៉ារ៉ា រដ្ឋលេខាធិការ ក្រសួងមហាផ្ទៃ ដឹកនាំប្រតិភូកម្ពុជា ទស្សនកិច្ចសិក្សាស្វែងយល់អំពីបទពិសោធនៃការគ្រប់គ្រងសំរាម នៅស្រុក GIANYAR នៃខេត្តបាលី សាធារណរដ្ឋឥណ្ឌូណេស៊ី ក្រោមក្របខ័ណ្ឌគម្រោងធ្វើឱ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ប្លាស្ទិកនៅប្រទេសកម្ពុជាដោយមានការអញ្ជេីញអមដំណេីរពី ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាលនិងជានាយកគម្រោង។

សម្រាប់កម្មវិធីទស្សនកិច្ចសិក្សានៅថ្ងៃទី៥នេះ គណៈប្រតិភូបានប្រជុំពិភាក្សាជាមួយតំណាងរដ្ឋបាលស្រុក GIANYAR នៃខេត្តបាលី ដើម្បីស្វែងយល់អំពីបទពិសោធល្អៗអំពីការគ្រប់គ្រងសំរាមរបស់ស្រុក និងបានចុះទៅទស្សនកិច្ចសិក្សានៅទីតាំងកែច្នៃសំរាមសម្រាប់ធ្វើជីកំប៉ុស្តិ៍ ក្នុងមជ្ឈមណ្ឌលវប្បធម៌ UBUD ស្ថិតក្នុងស្រុក GIANYAR នៃខេត្តបាលី ប្រទេសឥណ្ឌូណេស៊ី។

សូមជម្រាបជូនថា ក្រោយពីគណៈប្រតិភូកម្ពុជាបានជួបប្រជុំពិភាក្សា និងទស្សនកិច្ចសិក្សាអស់រយៈពេលចំនួន ៥ថ្ងៃរួចមក ឯកឧត្តម អ៊ុំ ម៉ារ៉ា បានអញ្ជើញដឹកនាំកិច្ចប្រជុំ បូកសរុបលទ្ធផលការងារនៃការបញ្ចប់ទស្សនកិច្ចសិក្សា និងបានណែនាំឱ្យរដ្ឋបាលក្រុង ស្រុក នៃខេត្តគោលដៅគម្រោងទាំងអស់ រៀបចំផែនការសកម្មភាពសម្រាប់អនុវត្ត ដោយផ្អែកទៅលើបទពិសោធនល្អៗ និងឆ្លុះបញ្ចាំង ព្រមទាំងកែតម្រូវឱ្យស្របទៅតាមបរិបទនៃរដ្ឋបាលក្រុង ស្រុក នៃខេត្តរបស់ខ្លួន ដើម្បីធានាប្រសិទ្ធភាពនៃការគ្រប់គ្រងសំរាម និងទីលាននៃការគ្រប់គ្រងសំរាមប្រកបដោយចីរភាព។