នាព្រឹកថ្ងៃសុក្រ ទី១២ ខែកក្កដា ឆ្នាំ២០២២នេះ ឯកឧត្តម ហែម ពិសិដ្ឋ អភិបាលរងនៃគណៈ អភិបា​ល​ខេត្តស្វាយរៀងតំណាង ឯកឧត្តម ម៉ែន វិបុល អភិបាលខេត្តបានអញ្ជើញជាអធិប​តី​ដឹកនាំកិច្ច​ប្រជុំពិភា​ក្សា​​ការងារពាក់ព័ន្ធនឹងការជំរុញលើ​ការអភិវឌ្ឍកំពង់ផែអូស្មាច់ ដើ​ម្បីឈានដល់​ការ​សម្រួលលើកា​រ​ដឹក​ជញ្ជូន​ទំនិញចេញចូលតាមផ្លូវទឹករវាងប្រទេសកម្ពុជានិងប្រទេសវៀតណាមនៅថ្ងៃខាងមុខ ។

កិច្ចប្រជុំនេះក៏មានការអញ្ជើញចូលរួមពីលោកប្រធានមន្ទីរធនធានទឹក និងឧតុនិយមខេត្ត  លោក​ប្រធាន​មន្ទីរពាណិជ្ជកម្មខេត្ត   លោកស្នងការរងនគរបាលខេត្ត  លោកអនុប្រធានសាខាគយ  និងរដ្ឋាករខេត្ត  លោក​អនុប្រធានមន្ទីរសាធារណការ និងដឹកជញ្ជូនខេត្ត  លោកអគ្គនាយករងកំពង់ផែស្វយ័តភ្នំពេញ  លោកប្រធានតំបន់សេដ្ឋកិច្ចពិសេសតាយសេង  លោកអភិបាលក្រុងស្វាយរៀង  លោកអភិបាលស្រុក​ស្វាយជ្រំ  ព្រមទាំងមន្ត្រីពាក់ពន្ធមួយចំនួនទៀត ។

សូមបញ្ជាក់ថាចំពោះកំពង់ផែអូស្មាច់នេះ ត្រូវបានក្រសួងសាធារណការ និងដឹកជញ្ជូន ធ្វើការស្ដារឡើ​ង​វិញក្នុងឆ្នាំ២០២០មានបណ្ដោយ ៦.៩៥០ម៉ែត្រ ទទឹងមាត់ច្រាំងខាងលើ ពី ៤០ម៉ែត្រ ទៅ ១០០ម៉ែត្រ ទទឹងបាតក្រោម (ផ្លូវនាវាចរណ៍) ពី១០ ទៅ ២០ម៉ែត្រ និងជម្រៅទឹកនៅលើផ្លូវនាចរណ៍រាក់បំផុត ៣,​៥​ម៉ែត្រ ជ្រៅបំផុត ៥,៦៨ម៉ែត្រ ។

បច្ចុប្បន្នរដ្ឋបាលខេត្ដ កំពុ​ងតែពិភាក្សាជាមួយដៃគូពាក់ព័ន្ធ ជាពិសេសអ្នកវិនិយោគឯកជន លើផែ​នកា​រ​អភិ​វឌ្ឍន៍កំ​ពង់ផែអូស្មាច់នេះព្រមទាំងកំពុងធ្វើការសម្របសម្រួលជាមួយភាគីខេត្ដឡុងអាន (វៀតណា​ម) ដើម្បីជំរុញនីតិវិធីផ្សេងៗសំដៅអនុញ្ញាតឱ្យនាវា អាចដឹកជញ្ជូនទំនិញឆ្លងពីប្រទេសវៀតណាម ចូល​ចតនៅកំពង់ផែអូស្មាច់នេះ៕

ប្រភព៖ រដ្ឋបាលខេត្តស្វាយរៀង