រដ្ឋបាលខេត្តកំពង់ធំ ដឹកនាំដោយឯកឧត្ដម សុខ លូ  អភិបាលខេត្ត  និងព្រះមន្ត្រីសង្ឃ  នៃគណៈគណខេត្ត  ដោយមានការចូលរួមពី អភិបាលរងខេត្ត សមាជិកក្រុមប្រឹក្សាខេត្ត កងកម្លាំងទាំងបី មន្ត្រីរាជការ  ប្រជាពលរដ្ឋ  សិស្សានុសិស្ស  លោកគ្រូ  អ្នក គ្រូ  ពុទ្ធសាសនិកជនប្រមាណ ៣០០០ នាក់/អង្គបានរៀបចំពិធីដង្ហែរក្បួនធម្មយាត្រា  ដើម្បីអបអរសាទរពិធីបុណ្យវិសាខបូជា  ដែលជាបុណ្យប្រពៃណីព្រះពុទ្ធសាសនា  ដែលជាសាសនារបស់រដ្ឋ នៅរសៀលថ្ងៃសៅរ៍ ១៥កើត ខែពិសាខ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី១៨ ខែឧសភា ឆ្នាំ២០១៩។

      ពិធីនេះបានដង្ហែរចេញពីវត្តឥន្រ្ទីយ៍សំវរ: ហៅវត្តកំពង់ធំ តាមបណ្ដោយផ្លូវជាតិលេខ៦ ទៅទិសខាងត្បូងកាត់មុខផ្សារកំពង់ធំ រហូតដល់រូបសំណាកដំរីជាន់ខ្លារួចត្រឡប់មកវត្តកំពង់ធំវិញតាមផ្លូវដដែល ដោយមានការរចនាឡើងនូវ  ក្បួនទីនាំងកម្កល់រូបសំណាក់តំណាងឲ្យព្រឹត្តិការណ៍ទាំងបី  របស់ព្រះបរមសមណគោត្តម (ប្រសូត្រ  ត្រាស់ដឹង  និងបរិនិព្វាន) ជាមួយនឹងការតុបតែងលម្អរនូវផ្កាភ្ញីជាដើម  និងក្បួនដង្ហែរអមរបស់មន្ត្រីសង្ឃ  ថ្នាក់ដឹកនាំខេត្ត  មន្ត្រីរាជការ  កងកម្លាំង ប្រដាប់ អាវុធ  សិស្សា នុសិស្ស  ពុទ្ធបរិស័ទ្ធ  យ៉ាងច្រើនកុះករ ។
      បន្ទាប់ពីហែក្បួន ធម្មយាត្រាចប់ឯកឧត្តមអភិបាលបានមានមតិសំណេះសំណាលនិងផ្ដាំផ្ញើដល់ ពុទ្ធបរិស័ទទាំងអស់ ត្រូវខិតខំគោរពបូជាព្រះពុទ្ធសាសនាដើម្បី ឲ្យយុវជនយើង ជំនាន់ក្រោយ បានយល់និងចូលរួម គោរពប្រតិបត្តិ ព្រះពុទ្ធសាសនាដែលជាសាសនារបស់ រដ្ឋយើងអោយបានគង់វង្ស៕ មុនីរម្យ

ប្រភព៖រដ្ឋបាលខេត្តកំពង់ធំ