ដើម្បីដោះស្រាយការលំបាករបស់ប្រជាពលរដ្ឋ នៅព្រឹកថ្ងៃទី១២ ខែកញ្ញា ឆ្នាំ២០១៩នេះ ឯកឧត្តម អ៊ុន ចាន់ដា អភិបាលខេត្តកំពង់ចាម អមដំណើរដោយថ្នាក់ដឹកនាំមន្ត្រីរាជការ មន្ទីរ អង្គភាព ពាក់ព័ន្ធ និងអាជ្ញាធរមូលដ្ឋាន ចុះសួរសុខទុក្ខ និងនាំអំណោយសង្គ្រោះបន្ទាន់ចែកជូនប្រជាពលរដ្ឋរងផលប៉ះពាល់ដោយសារគ្រោះទឹកជំនន់ ដែលបានរុះរើផ្ទះ ៣៣គ្រួសារ បច្ចុប្បន្ននេះ នៅស្រុកស្រីសន្ធរ ដោយក្នុង ១គ្រួសារតង់ ១ និងថវិកា ២០ម៉ឺនរៀល ដើម្បីដោះស្រាយការរុះរើលំនៅដ្ឋាន ។

សូមបញ្ជាក់ថា ក្នុងចំណោមឃុំទាំង ១៤ នៃស្រុកស្រីសន្ធរ មានឃុំចំនួន ៩ បានទទួលរងនូវផល​ប៉ះពាល់​ដោយ​សារទឹកជន់លិច។ ដោយឡែក ប្រជាពលរដ្ឋប្រឈមនឹងរុះរើផ្ទះ ដោយសារការស្រុតច្រាំង មានប្រមាណជាង ១០០គ្រួសារ ក្នុងនោះពលរដ្ឋ ៣៣គ្រួសារ នៅឃុំចំនួន ពីរ គឺឃុំកោះអណ្ដែត និងឃុំឬស្សីស្រុក បានរុះរើលំនៅដ្ឋាន៕