បន្ទាយមានជ័យ៖ លោកឧត្តមសេនីយ៍ត្រី​ សឿម​ សារិទ្ធ​ ស្នងការនៃស្នងការដ្ឋាននគរបាលខេត្តបន្ទាយមានជ័យ បានអញ្ជើញចុះជួបសំណេះសំណាល និងសួរសុខទុក្ខ ជាមួយកងកម្លាំងនៃអធិការដ្ឋាននគរបាលក្រុងសិរីសោភ័ណ ​អធិការដ្ឋាននគរបាលក្រុងប៉ោយប៉ែត អធិការដ្ឋាននគរបាលស្រុកអូរជ្រៅ និងអធិការដ្ឋាននគរបាលស្រុកម៉ាឡៃ នៅថ្ងៃទី ៣០ ខែមីនា ឆ្នាំ២០២៦។

កម្មវិធីនេះក៏មានការអញ្ជើញចូលរួមពី លោកឧត្តមសេនីយ៍ត្រី វរសេនីយ៍ស្នងការរង លោកអធិការ អធិការរង នាយផ្នែក នាយប៉ុស្តិ៍នគរបាលរដ្ឋបាល និងមន្ត្រីទាំងអស់ នៃអធិការដ្ឋាននគរបាលក្រុង២ និងអធិការដ្ឋាននគរបាលស្រុក២។

ដើម្បីធានាបានស្ថេរភាព សន្តិសុខ សណ្តាប់ធ្នាប់ និងសុវត្ថិភាពសង្គម លោកឧត្តមសេនីយ៍ត្រី​ សឿម​ សារិទ្ធ​ បានដាក់ចេញទិសដៅអនុវត្តដល់កម្លាំងនគរបាលទាំងអស់ដូចតទៅ៖

១-ត្រូវបន្តយកចិត្តទុកដាក់គ្រប់គ្រង ក្តាប់សភាពការណ៍សន្តិសុខ នូវសកម្មភាព អសន្តិសុខជាតិ អសន្តិសុខក្នុងសង្គម ក្តាប់នូវសកម្មភាពភវកម្មក្រុមឧទាម ប៉ុងប៉ងផ្តួលរាជរដ្ឋាភិបាលស្របច្បាប់។ 

២-ត្រូវខិតខំនិងជំរុញច្បាម បង្ការ បង្រាប បទល្មើសគ្រប់ប្រភេទ។ 

៣-ប៉ុស្តិ៍នគរបាលត្រូវផ្សារភ្ជាប់ជាមួយ សហគមន៍ ការផ្តល់សេវាសាធារណៈ បានលឿន រហ័សទាន់ចិត្ត ក្តាប់គ្រប់គ្រង មុខសញ្ញាចាស់ថ្មី។ 

៤-បន្តស្រាវជ្រាវទប់ស្កាត់ អំពើរជួញដូរមនុស្សគ្រប់ទម្រង់ និងបទល្មើសឆ្លងដែនខុសច្បាប់។

៥-ពង្រឹងទប់ស្កាត់ បទល្មើសគ្រប់ប្រភេទ ក្មេងទំនើង និងបទល្មើសជួញដូរគ្រឿងញៀន នៅតាមមូលដ្ឋានឱ្យមានប្រសិទ្ធភាព។

៦-បន្តរឹតបន្តឹងអនុវត្តន៍ច្បាប់ចរាចរណ៍ផ្លូវគោកទូទាំងខេត្ត (តាមរយៈការធ្វើការអប់រំណែនាំ និងផ្សព្វផ្សាយច្បាប់ចរាចរណ៍) តាមខ្លឹមសារអនុក្រឹត្យលេខ៣៩ អ.ន.ក្រ ដើម្បីកាត់បន្ថយអត្រាគ្រោះថ្នាក់ចរាចរណ៍ឱ្យនៅកម្រិតទាបបំផុត។

៧-បន្តព្រឹង និងចុះផ្សព្វផ្សាយគោលនយោបាលភូមិ ឃុំមានសុវត្ថិភាព។

៨-ពង្រឹងការយាមល្បាត វេនប្រចាំបញ្ជា២៤ម៉ោង និងត្រៀមកម្លាំង សម្ភារៈ មធ្យោបាយ ដើម្បីអន្តរាគមន៍ដោះស្រាយសំណូមពរជូនប្រជាពលរដ្ឋឱ្យបានទាន់ពេលវេលា ពិសេសគ្រោះធម្មជាតិ និងករណីអគ្គិភ័យដែលអាចកើតមានជាយថាហេតុ។

៩-ត្រូវមានការលើកទឹកចិត្ត ដល់កងកម្លាំងដែលមានស្នាដៃ ក្នុងការបំពេញបេសកម្ម និងការងារផ្សេងៗ។

១០-ត្រូវពង្រឹងកិច្ចសហការល្អជាមួយស្ថាប័នពាក់ព័ន្ធ។

១១-ត្រូវមានសាមគ្គីភាពផ្ទៃក្នុងឱ្យបានល្អ៕

ប្រភព៖ ស្នងការដ្ឋាននគរបាលខេត្តបន្ទាយមានជ័យ