ខេត្តបាត់ដំបង៖ នៅថ្ងៃសុក្រ ទី១៣ ខែធ្នូ ឆ្នាំ២០២៤ ដោយបានការអនុញ្ញាតរបស់ លោកឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង លោកឧត្តមសេនីយ៍ត្រី លឹម ពុទ្ធីឡា ស្នងការរង ទទួលផែនការងារគ្រប់គ្រងអាវុធ គ្រឿងផ្ទុះ និងអគ្គិភ័យ និងលោកឧត្តមសេនីយ៍ត្រី ឡាយ ឈុនហាំង ស្នងការរង ទទួលដឹកនាំការិយាល័យគ្រប់គ្រងអាវុធ គ្រឿងផ្ទុះ និងជាតិពុល បានដឹកនាំកិច្ចប្រជុំសំណេះសំណាល ដើម្បីពង្រឹងប្រសិទ្ធភាពការងារ និងបង្កើនភាពស្និទ្ធស្នាលជាមួយមន្រ្តីនគរបាលក្នុងផែនការងារគ្រប់គ្រងអាវុធ គ្រឿងផ្ទុះ និងអគ្គិភ័យ ក្នុងនោះលោកស្នងការរងក៏បានលើកឡើងនូវចំណុចមួយចំនួនដូចជា៖

-ត្រូវគោរពវិន័យនគរបាលជាតិកម្ពុជា លេខ ៨៧៣ប្រក ចុះថ្ងៃទី ០៥-មីនា-២០២៤ របស់ក្រសួងមហាផ្ទៃ

-ការប្រើប្រាស់ឯកសណ្ឋាននគរបាលជាតិឱ្យបានត្រឹមត្រូវ ស្របតាមអនុក្រឹត្យលេខ ១៤ អនប្រ.បក ចុះថ្ងៃទី ២៩-មីនា-២០០០

-គោរពតាមសេចក្តីណែនាំលេខ ០១៧ សណន ចុះថ្ងៃទី ០៩-ធ្នូ-២០២៤ ស្តីពី ការប្រើប្រាស់ឯកសណ្ឋាននគរបាលជាតិ លើបណ្តាញសង្គមផ្សេងៗ របស់ឯកឧត្តម នាយឧត្តមសេនីយ៍ ស ថេត អគ្គស្នងការ នៃអគ្គស្នងការនគរបាលជាតិ (ដូចជា Facebook, Tiktok, Instagram និងបណ្តាញសង្គមផ្សេងៗ)

-ត្រូវបំពេញការងាររបស់ខ្លួនឱ្យបានល្អ និងប្រកបដោយវិជ្ជាជីវៈ ក្រមសីលធម៌ល្អ តម្លាភាព សុក្រិត្យភាព រាល់ពាក្យសំដីអាកប្បកិរិយាទន់ភ្លន់តែម៉ឺងម៉ាត់ក្នុងការងារ និងមានសាមគ្គីភាពផ្ទៃក្នុង

-រកដំណោះស្រាយលើបញ្ហាប្រឈម និងលើកផែនការការងារបន្តសម្រាប់ខែថ្មី ក្នុងឆ្នាំថ្មីខាងមុខ។

ក្នុងកិច្ចប្រជុំនោះដែរក៏មានការចូលរួមពី លោកនាយការិយាល័យទាំង២ចំណុះផែន លោក-លោកស្រីនាយរងការិយាល័យ លោក-លោកស្រីនាយ-នាយរងផ្នែក និងមន្រ្តីនគរបាលក្នុងផែនការងារគ្រប់គ្រងអាវុធ គ្រឿងផ្ទុះ និងអគ្គិភ័យទាំងអស់៕

ប្រភព៖ ស្នងការដ្ឋាននគរបាលខេត្តបាត់ដំបង