កោះកុង៖ នារសៀលថ្ងៃទី២៨ ខែតុលា ឆ្នាំ២០២៦ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ បានអញ្ជើញជាអធិបតីដឹកនាំកិច្ចប្រជុំប្រចាំខែតុលា ឆ្នាំ២០២៦ និងពិនិត្យទិសដៅការងារបន្ត ដោយមានការអញ្ជើញចូលរួមពីឯកឧត្តម លោកជំទាវ ជាអគ្គនាយករង ប្រធាននាយកដ្ឋានជំនាញទាំង៥ ប្រធានមណ្ឌលអប់រំកែប្រែ និងប្រធានពន្ធនាគាររាជធានី-ខេត្ត នារសៀលថ្ងៃទី២៨ ខែតុលា ឆ្នាំ២០២៦ នៅខេត្តកោះកុង។

ក្នុងកិច្ចប្រជុំនេះ ថ្នាក់ដឹកនាំ និងគ្រប់ប្រធានអង្គភាពបានចូលរួមផ្តល់មតិយោបល់ ពិភាក្សា និងផ្លាស់ប្តូរទស្សនៈលើចំណុចខ្លាំង ចំណុចខ្វះខាត និងបញ្ហាប្រឈមនានា ដើម្បីរួមគ្នាស្វែងរកដំណោះស្រាយ និងកែលម្អការងារគ្រប់គ្រងមណ្ឌលអប់រំកែប្រែ និងពន្ធនាគាររាជធានី-ខេត្ត ឱ្យកាន់តែមានប្រសិទ្ធភាព និងល្អប្រសើរឡើង។

ឆ្លៀតក្នុងឱកាសនោះ ឯកឧត្តម អគ្គនាយក បានផ្តល់អនុសាសន៍ណែនាំសំខាន់ៗចំនួន៧ចំណុច ដើម្បីពង្រឹងភាពធន់ និងធានានិរន្តរភាពនៃប្រតិបត្តិការការងារ រួមមាន៖

១. ភាពធន់នៃទិន្នន័យ៖ ត្រូវរៀបចំប្រព័ន្ធបម្រុងទុកទិន្នន័យ (Backup) និងផែនការស្តារទិន្នន័យឡើងវិញក្នុងករណីមានអាសន្ន។

២. ភាពធន់នៃប្រព័ន្ធឌីជីថល៖ ត្រូវធានាឱ្យប្រព័ន្ធដំណើរការបានរលូន និងមានផែនការបម្រុងសម្រាប់ដោះស្រាយពេលប្រព័ន្ធមានបញ្ហា។

៣. ភាពធន់នៃហេដ្ឋារចនាសម្ព័ន្ធ៖ ត្រូវធានានិរន្តរភាពការងារ ទោះបីស្ថិតក្នុងស្ថានភាពលំបាក ឬមានការរំខានក៏ដោយ។

៤. ភាពធន់នៃធនធានមនុស្ស៖ ត្រូវរៀបចំផែនការបន្តវេនសម្រាប់មុខតំណែងសំខាន់ៗ ដើម្បីធានាការបន្តការងារប្រកបដោយប្រសិទ្ធភាព។

៥. ភាពធន់នៃហិរញ្ញវត្ថុ៖ ត្រូវគ្រប់គ្រង និងបែងចែកថវិកាប្រកបដោយភាពបត់បែន តម្លាភាព និងសន្សំសំចៃ។

៦. ភាពធន់នៃការប្រាស្រ័យទាក់ទង៖ ត្រូវធានាឱ្យមានបណ្តាញទំនាក់ទំនងបម្រុង និងការតភ្ជាប់ជាបន្តបន្ទាប់ ក្នុងករណីប្រព័ន្ធទំនាក់ទំនងទូទៅមានការរំខាន។

៧. ភាពធន់នៃការផ្គត់ផ្គង់៖ ត្រូវធានាការផ្គត់ផ្គង់សម្ភារ និងឧបករណ៍ចាំបាច់សម្រាប់បម្រើការងារឱ្យបានទៀងទាត់ និងជាប្រចាំ៕