តាកែវ៖ នៅព្រឹកថ្ងៃសៅរ៍ ទី០១ ខែតុលា ឆ្នាំ២០២២ ឯកឧត្តម ខាយ ឃុនហេង រដ្ឋលេខាធិកា​រ​ក្រសួង​ប្រៃសណីយ៍ និងទូរគមនាគមន៍ និង ឯកឧត្តម អ៊ូច ភា អភិបាល នៃគណៈអភិបាលខេត្ត តាកែវ ព្រម​ទាំង ឯកឧត្តម លោកជំទាវ ប្រតិភូអមដំណើរបានអញ្ជើញសម្ពោធដាក់ឱ្យដំណើរការអាគារស​ង្គ្រោះ​បន្ទា​ន់ មន្ទីរពេទ្យបង្អែកបាទី ស្រុកបាទី ខេត្តតាកែវ។ ដែលពិធីនេះក៏មានការអញ្ជើញចូលរួមដោយ លោក លោកស្រី អភិបាលរងខេត្ត លោក លោកស្រី ប្រធានមន្ទីរអង្គភាពពាក់ព័ន្ធជុំវិញខេត្ត និងកងកម្លាំងទាំង​​បី លោក ភួន ឈីម អភិបាលស្រុកបាទី លោក លោកស្រី អភិបាលរងស្រុក មន្រ្តីចំណុះរដ្ឋបាលស្រុក និងបងប្អូ​នប្រជាពលរដ្ឋជាច្រើនកុះករ។

ឆ្លៀតក្នុងឱកាសនោះដែរ ឯកឧត្តម អ៊ូច ភា អភិបាលខេត្តតាកែវ បានណែនាំដល់គ្រូពេទ្យទាំងអស់ រាល់ការពិនិត្យ និងព្យាបាលអ្នកជំងឺវាជារឿងដែលក្រុមគ្រូពេទ្យទាំងអស់ត្រូវតែអនុវត្ត ឱ្យបានល្អប្រ​សើរ​ជាចាំបាច់ហើយ សូមកុំ យកលុយ ជាធំ មុន ការពិនិត្យនិងព្យាបាល ។ ម្យ៉ាងទៀត ការប្រកា​ន់ខ្ជាប់ ក្រមសីលធម៌វិជ្ជាជីវៈ របស់ ក្រុមគ្រូពេទ្យ បង្ហាញឱ្យឃើញ ពី ភាពថ្លៃថ្នូរ និង ទទួលបាន​ការគោរព ពី មជ្ឈដ្ឋានទូទៅ និង អ្នកជំងឺផងដែរ ។

ឯកឧត្តមអភិបាលខេត្ត បានបន្ថែមថា៖ ក្រុមគ្រូពេទ្យ របស់ យើង ក៏ ត្រូវតែពង្រឹងសមត្ថភាពរបស់ខ្លួន ឱ្យកាន់តែល្អថែមទៀត លើការប្រកបវិជ្ជាជីវៈ វេជ្ជសាស្ត្រហើយក្នុងនោះយើង ក្នុងនាមជាគ្រូពេទ្យ ត្រូវប្តូរ​ឥរិយាបទ គោរពជីវិត រាងកាយ និង សេក្តីថ្លៃថ្នូរ របស់ មនុស្សដើម្បី ជាគុណប្រយោជន៍ របស់ អ្នកជំងឺ ពិសេស គឺក្រុមគ្រូពេទ្យក៏ត្រូវតែផ្លាស់ប្តូរទម្លាប់នៃការពិនិត្យព្យាបាលជំងឺជូនប្រជាពលរដ្ឋ ឱ្យ កាន់តែមាន​ប្រសិទ្ធភាពខ្ពស់ និងកាន់តែល្អប្រសើរថែមទៀត។

យោងតាមរបាយការណ៍របស់ លោក ភួន ឈីម អភិបាលស្រុកបាទី បានឱ្យដឹងថា ដោយមើលឃើញនូ​វការលំបាក ខ្វះខាតអាគារសង្គ្រោះបន្ទាន់ លោកប្រធានការិយាល័យសុខាភិបាលស្រុកប្រតិបត្តិបាទី លោក​ប្រធានមន្ទីរពេទ្យបង្អែកបាទី បានទំនាក់ទំនងស្នើសុំ លោក ប៉ែន ស៊ីវន  ដែលជាអានិកជន​ខ្មែររស់​នៅប្រទេសណ័រវេស ព្រមទាំងសហការី បានផ្ដើមគំនិត សាងសង់អាគារសង្គ្រោះបន្ទាន់ នេះឡើង ដើម្បីជួយសម្រួលដល់ការផ្ដល់សេវាសុខាភិបាលជូនប្រជាពលរដ្ឋ ជាពិសេសដល់កម្មករ កម្មការនីរោងចក្រ ពេលដួលសន្លប់។

ក្រោយបានពិនិត្យរកទីតាំងរួចមក អាគារនេះក៏ត្រូវបានចាប់ផ្ដើមសាងសង់នៅថ្ងៃទី១៥ ខែមីនា ឆ្នាំ២០២០ បន្ទាប់ពីធ្វើពិធីក្រុងពាលីសុំម្ចាស់ទឹកម្ចាស់ដីរួចហើយ ដោយមានការចូលរួមពីថ្នាក់ដឹកនាំ និងមន្ត្រីសុខា​ភិបាលនៃមន្ទីរពេទ្យបង្អែកបាទី ព្រមទាំង លោក ប៉ែន ស៊ីវុន ជាម្ចាស់ជំនួយ។ អាគារសង្គ្រោះប​ន្ទាន់នេះ​សាងសង់ពីថ្មប្រក់ក្បឿងមានទំហំ(៣០ ម៉ែត្រ x ១០ ម៉ែត្រ) មាន៣បន្ទប់ គឺបន្ទប់សំរាប់អ្នកជំងឺ​ដែលដាក់​គ្រែបានចំនួន២០គ្រែ បន្ទប់គ្រូពេទ្យយាម និងបន្ទប់ដេររបួស។ មានបន្ទប់ទឹក និងបង្គន់ចំនួន៤ មានបំពាក់​ភ្លើងអគ្គិសនី និងកង្ហារព្រមទាំងប្រព័ន្ធទឹកសំរាប់ប្រើប្រាស់ក្នុងបង្គន់ និងបន្ទប់ទឹកផងដែរ។

ដោយឡែកសមាគមន៍សាសនាចក្រ នៃពុទ្ធបរិស័ព្ទ ថ្ងៃចុងក្រោយតាមរយៈឯកឧត្ដមបណ្ឌិត ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានជួយរៀបចំ និងផ្ដល់សំភារៈបរិក្ខាពេទ្យ មួយចំនួនដូចជា patient monitor ម៉ាស៊ីនភ្លើង៦០KAV ចំនួន១គ្រឿង,ម៉ាស៊ីនរំងាប់មេរោគ និងម៉ាស៊ីនX Ray digital ចំនួន១គ្រឿង។ល៕

ប្រភព៖ រដ្ឋបាលខេត្តតាកែវ