(រដ្ឋបាលខេត្តកំពង់ធំ)÷ ឯកឧត្តម សរ សុវណ្ណ រដ្ឋលេខាធិកាក្រសួងរៀបចំដែនដី នគររូបនីយកម្ម សំណង់ និងសុរិយោដី និងឯកឧត្តម ងួន រតនៈ អភិបាលខេត្តកំពង់ធំ នៅព្រឹកថ្ងៃទី១៩ ខែមេសា ឆ្នាំ២០២៤ បានអញ្ជើញប្រគល់វិញ្ញាបនបត្រសម្គាល់ម្ចាស់អចលនវត្ថុ ចំនួន ប័ណ្ណ២.៣២២បណ្ណ ស្មើនិង១.១៤៨គ្រួសារ ជូនប្រជាពលរដ្ឋនៅភូមិជរ និងស្វាយ ឃុំសណ្តាន់ ស្រុកសណ្តាន់ ខេត្តកំពង់ធំ ដោយមានការចូលរួមពីមន្ត្រីជំនាញ និងប្រជាពលរដ្ឋជាច្រេីនគ្រួសារផងដែរ។  

លោក អ៊ឹម សុឌីណា ប្រធានមន្ទីរដែនដី នគររូបនីយកម្ម សំណង់ និងសុរិយោដីខេត្តកំពង់ធំ បានសំណូមពរដល់បងប្អូនប្រជាពលរដ្ឋ ត្រូវចូលរួមជាមួយក្រុមការងារបច្ចេកទេសរបស់មន្ទីរ ក្នុងការវាស់វែង បំពេញទិន្នន័យឱ្យបានគ្រប់ៗគ្នា ចៀសវាងក្រុមការងារវាស់វែងរួច សល់ដីរបស់បងប្អូនដាក់ជាដីគ្មានទិន្នន័យ ពិសេសករណីមានទំនាស់រវាងអ្នកជាប់ព្រំ គួររួមគ្នាដោះស្រាយតាមវិធីសាស្រ្តឈ្នះៗទាំងអស់គ្នា ដើម្បីយើងរស់នៅក្នុងភូមិដ្ឋានប្រកបដោយភាពសុខដុមរម្យនា។ អាជ្ញាធរពាក់ព័ន្ធត្រូវចូលរួមសហការណ៍ឱ្យបានយ៉ាងសកម្ម ដើម្បីជួយដល់ក្រុមការងារចុះបញ្ជីដីធ្លីមានលក្ខណះជាប្រព័ន្ធគ្រប់ភូមិឱ្យបានដំណើរការកាន់តែឆាប់រហ័ស មួយវិញទៀតសូមបងប្អូន ដែលមានដីអំណោយ ឬទិញលក់ ត្រូវបំពេញកាត្វកិច្ចបង់ពន្ធប្រថាប់ត្រា កំណត់ដែលមានក្នុងប្រកាស់អន្តរក្រសួង។    

ថ្លែងក្នុងកម្មវិធីនេះឯកឧត្តម ងួន រតនៈ បានបញ្ជាក់ថារាជរដ្ឋាភិបាលកម្ពុជានីតិកាលទី៧ ដែលមានសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសអនុវត្តយុទ្ធសាស្ត្របញ្ចកោណដំណាក់កាលទី១ ដោយបានដាក់ចេញនូវយុទ្ធសាស្ត្រ ដើម្បីដំណើរការងារ សមធម៌ ប្រសិទ្ធភាព និងចីរភាព ព្រមទាំងបានកំណត់យកអាទិភាពគន្លឹះ៥គឺ មនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសបច្ចេកវិទ្យាឌីជីថល។ ប្រជាពលរដ្ឋមានប្លង់កម្មសិទ្ធិ មានការពារដោយច្បាប់ ធានាដោយរដ្ឋ ហើយប្រជាពលរដ្ឋអាចយកប្លង់ទៅប្រើប្រាស់ទាញយកប្រយោជន៍ដើម្បីលើកស្ទួយជីវភាពគ្រួសាររបស់គាត់។  

ឯកឧត្តម សរ សុវណ្ណ មានប្រសាសន៍ថា ការចុះធ្វើវិញ្ញាបនបត្រសម្គាល់ម្ចាស់អចលនវត្ថុនេះ មានការស្មុគស្មាញហើយមន្ត្រីជំនាញទាំងអស់ធ្វើការងារដោយប្រុងប្រយ័ត្ន ហ្មត់ចត់បំផុត ក្នុងការធ្វើបណ្ណកម្មសិទ្ធិចុះបញ្ជីដីធ្លី មានលក្ខណៈជាប្រព័ន្ធសម្រាប់ភូមិនីមួយៗ រហូតសម្រេចបានផ្តល់វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋឱ្យពួកគាត់ប្រើប្រាស់ដោយស្របច្បាប់ និងមានប្រសិទ្ធក្នុងការប្រើប្រាស់ឱ្យបានត្រឹមត្រូវ។

គួរបញ្ជាក់ផងដែរថា ពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ ចំនួន ប័ណ្ណ២.៣២២បណ្ណ ស្មើនិង១.១៤៨គ្រួសារ ជូនប្រជាពលរដ្ឋនៅភូមិជរ មានចំនួនប័ណ្ណសរុប ១.២៧៤បណ្ណ និងភូមិស្វាយមានចំនួនប័ណ្ណសរុប ១.០៤៨បណ្ណផងដែរ។    

ប្រពភ ៖ រដ្ឋបាលខេត្តកំពង់ធំ