តាកែវ៖ នៅព្រឹកថ្ងៃព្រហស្បតិ៍ ទី២៦ ខែមីនា ឆ្នាំ២០២០ ឯកឧត្តម អ៊ូច ភា អភិបាលនៃគណៈអភិបាលខេត្តតាកែវ និងជាប្រធានគណៈកម្មការដើម្បីត្រួតពិនិត្យត្រៀមបង្ការ និងទប់ស្កាត់ ការរាលដាលនៃជម្ងឺរលាកផ្លូវដង្ហើម ដែលបង្កឡើងដោយមេរោគ កូវីដ១៩ (COVID-19) បានអញ្ជើញបើកកិច្ចប្រជុំគណៈកម្មការ ដើម្បីត្រួតពិនិត្យការងារដែលបានអនុវត្តកន្លងមក និងដាក់វិធានការមួយចំនួនដើម្បីបន្តអនុត្តន៍ ដែលកិច្ចប្រជុំនេះបានរៀបចំធ្វើឡើងនៅសាលប្រជុំសាលាខេត្ត។
ឯកឧត្តម អ៊ូច ភា អភិបាលខេត្តតាកែវ បានមានប្រសាសន៍ ធ្វើការណែនាំដល់សមាជិក សមាជិកា ទាំងអស់យកចិត្តទុកដាក់អនុវត្តនូវចំណុចមួយចំនួនដូចខាងក្រោម៖
១-ត្រូវផ្សព្វផ្សាយអំពីការការពារខ្លួនដើម្បីកុំអោយឆ្លងជំងឺកូវីដ-១៩ មកខ្លួនឯង និងអ្នកដទៃ ដោយឃុំខ្លួនឯងរយះពេល១៤ថ្ងៃចំពោះអ្នកចំណូលថ្មី បានន័យថាអ្នកដែលបានឆ្លងដែនពីបរទេសចូលមកក្នុងភូមិ ស្រុក នៃប្រទេសកម្ពុជា។
២-ត្រូវប្រើមធ្យោបាយសមស្របចំពោះអ្នកដែលមិនព្រមស្តាប់តាមការណែនាំរបស់អាជ្ញាធរមានសមិត្តកិច្ច។
៣-អាជ្ញាធរក្រុង ស្រុក រកទីតាំងត្រៀមសម្រាប់ទុកដាក់ដោយឡែកនូវអ្នកជម្ងឺនៅពេលមានផ្ទុះភ្លាមៗកើតឡើង។
៤-ក្រុង ស្រុកត្រូវសហការជាមួយមន្ត្រីសុខាភិបាល ក្នុងការត្រួតពិនិត្យអ្នកចំណាកស្រុកដែលទើបត្រប់មកវិញថ្មីៗនេះ។
៥-ផ្នែកបច្ចេកទេសត្រូវបាញ់ថ្នាំសម្លាប់មេរោគ កង់រថយន្តដឹកទំនិញនាំចូលអោយបានត្រឹមត្រូវ ជាពិសេសត្រូវធ្វើការសហការជាមួយមន្រ្តីជំនាញសុខាភិបាល ធ្វើការបាញ់ថ្នាំសម្លាប់មេរោគនៅតាមទីប្រជុំជន និងផ្សារតាមក្រុង ស្រុក ជាពិសេសត្រូវចុះធ្វើការអប់រំផ្សព្វផ្សាយអំពីវិធានការ អប់រំ ទប់ស្កាត់ និងបង្ការនូវមេរោគកូវីដ១៩ នេះឲ្យបានទូលំទូលាយ ។
ឆ្លៀតក្នុងឱកាសនោះដែរ ឯកឧត្តម អ៊ូច ភា អភិបាលខេត្ត ក៏បានធ្វើការឧបត្ថម្ភថវិកា ចំនួន ១០០ឃុំសង្កាត់ ទូទាំងខេត្ត ដោយក្នុងមួយឃុំៗ ទទួលបានថវិកា ១០ ម៉ឺនរៀល និងអាលកុលលាងដៃ ដើម្បីចូលរួមចលនាផ្សព្វផ្សាយវិធានការ អប់រំ ទប់ស្កាត់ និងបង្ការនូវមេរោគ កូវីដ១៩ ដែលកំពុងរាតត្បាតជាសកល៕
ប្រភព៖ រដ្ឋបាលខេត្តតាកែវ