នាព្រឹកថ្ងៃសុក្រ ទី២៧ ខែធ្នូ ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញជាអធិបតីភាពដ៏ខ្ពង់ខ្ពស់បិទមហាសន្និបាតលើកទី៣ អាណត្តិទី៣ សម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ នៃព្រះរាជាណាចក្រកម្ពុជា នៅសណ្ឋាគារភ្នំពេញ ដោយមានការចូលរួមពី ថ្នាក់ដឹកនាំគណៈប្រតិភូ ក្រុមប្រឹក្សា អភិបាលរាជធានី-ខេត្ត តំណាងដៃគូអភិវឌ្ឍន៍ និងអង្គការសង្គមស៊ីវិល ព្រមទាំងប្រតិភូមហាសន្និបាត និងភ្ញៀវកិត្តិយជាច្រើនផងដែរ។

      សូមបញ្ជាក់ដែរថា មហាសន្និបាតថ្ងៃនេះ គឺធ្វើជាលើកទី៣ ហើយក៏ជាព្រឹត្តិការណ៍ប្រវត្តិ​សាស្ត្រក្នុងការបន្តនិរន្តរភាពដល់ស្ថាប័នមួយដែលតំណាងឲ្យក្រុមប្រឹក្សាក្រុង ស្រុក ខណ្ឌ ឃុំ សង្កាត់ នៅទូទាំងប្រទេស ពោលគឺ "សម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ ដែលត្រូវបានបង្កើតឡើងក្នុងបំណងលើកកម្ពស់ឋានៈ និងពង្រឹងការអនុវត្តសិទ្ធិអំណាច តួនាទី និងការទទួលខុសត្រូវស្របច្បាប់របស់ក្រុមប្រឹក្សាក្រុង ស្រុក ខណ្ឌ ឃុំ សង្កាត់ ដែលតំណាងឱ្យផលប្រយោជន៍ និងសម្លេងរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន។

សូមជម្រាបថា សមាគមក្រុមប្រឹក្សាថ្នាក់ក្រោមជាតិដែលត្រូវបានទទួលស្គាល់ជាសកល មានតួនាទី ភារកិច្ចសំខាន់ៗរួមមាន៖
១.ជាមជ្ឈមណ្ឌលចងក្រងឯកសារ និងប្រមូលផ្ដុំព័ត៌មានអំពីក្រុមប្រឹក្សានៅថ្នាក់ក្រោមជាតិ, ២.ជាវេទិកាសម្រាប់ផ្សព្វផ្សាយ និងចែករំលែកព័ត៌មាន គោលនយោបាយ ច្បាប់ លិខិតបទដ្ឋាន និងគោលការណ៍ណែនាំផ្សេងៗរបស់រដ្ឋាភិបាលនៅថ្នាក់ជាតិដល់ក្រុមប្រឹក្សាថ្នាក់ក្រោមជាតិដែលជាសមាជិករបស់សមាគម, ៣.ជាយានសម្រាប់ពាំនាំបញ្ហាប្រឈមនានារបស់ក្រុមប្រឹក្សាថ្នាក់ក្រោមជាតិ ដើម្បីជម្រាបជូនរដ្ឋាភិបាលជាតិក្នុងបំណងស្វែងរកដំណោះស្រាយ, ៤.ជាសម្លេងរបស់ក្រុមប្រឹក្សាថ្នាក់ក្រោមជាតិក្នុងការស្វែងរកការគាំទ្រ និងការការពារផលប្រយោជន៍រួមរបស់ក្រុមប្រឹក្សាថ្នាក់ក្រោមជាតិ, ៥.ជាអ្នកផ្តល់សេវាពិគ្រោះយោបល់និងការកសាងសមត្ថភាពដល់សមាជិករបស់ខ្លួនជាក្រុមប្រឹក្សាថ្នាក់ក្រោមជាតិ និង ៦.ជាយន្តការសម្រាប់ឲ្យក្រុមប្រឹក្សាថ្នាក់ក្រោមជាតិ ចែករំលែកចំណេះដឹង មេរៀន និងបទពិសោធន៍ល្អៗ ទាក់ទងនឹងការងារអភិបាលកិច្ច ការងារអភិវឌ្ឍន៍មូលដ្ឋាន និងការផ្តល់សេវាជូនប្រជាពលរដ្ឋ ប្រកបដោយប្រសិទ្ធភាព តម្លាភាព និងគណនេយ្យភាព៕ រតនា

ដោយ៖ នាយកដ្ឋានព័ត៌មានវិទ្យា