នៅទីវត្តព្រះក្រាល ស្ថិតនៅភូមិថ្មី ឃុំខ្នងភ្នំ ស្រុកស្វាយលើ ខេត្តសៀមរាប ត្រូវបានធ្វើពិធីសម្ពោធ និង កាត់ឫសសីមា ដាក់ឲ្យប្រើប្រាស់ពុទ្ធានុញ្ញាត ក្រោមអធិបតីភាពឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការនិមន្ត និង អញ្ជើញចូលរួមពីព្រះសង្ឃ ឯកឧត្តម លោកជំទាវ ព្រមទាំងអស់លោក លោកស្រីជាសមាជិកក្រុមការងារខេត្ត ថ្នាក់ដឹកនាំមន្ទីរ ស្ថាប័ន អង្គភាព អាជ្ញាធរស្រុក ឃុំ មន្ត្រីរាជ លោកគ្រូអ្នកគ្រូ សិស្សានុសិស្ស សីលវ័ន្ត សីលវតី និង ប្រជាពលរដ្ឋយ៉ាងច្រើនកុះករផងដែរ នាថ្ងៃព្រហស្បតិ៍ ០១រោច ខែផល្គុន ឆ្នាំច សំរឹទ្ធសក័ ព.ស ២៥៦២ ត្រូវនឹងថ្ងៃទី២១ ខែមីនា ឆ្នាំ២០១៩។ 

      ឯកឧត្តម អភិបាលខេត្ត បានថ្លែងអំណរគុណចំពោះ អាជ្ញាធរគ្រប់លំដាប់ថ្នាក់ មន្ត្រីរាជការ និង ក្រុមការងារខេត្ត  សប្បុរសជនជិតឆ្ងាយ  ព្រមទាំងព្រះសង្ឃនៅវត្តព្រះក្រាល ដែលមានសទ្ធាជ្រះថ្លា សហការកសាងសមិទ្ធផលដែលកំពុងត្រូវបានសម្ពោធនាពេលនេះ។ ឯកឧត្តមក៏បានលើកផងដែរថា សមិទ្ធផលទាំងអស់ដែលបានកំពុងត្រូវសម្ពោធដាក់ឲ្យប្រើប្រាស់ ក្នុងឱកាសនេះ គឺជាសមិទ្ធផលថ្មី នៃចំណងដៃទទួលសាទរឆ្នាំថ្មី ឆ្នាំកុរ ដែលកើតពីការរួមសាមគ្គី ទាំងព្រះសង្ឃ សប្បុរសជន និង ពុទ្ធបរិស័ទជិតឆ្ងាយដែលរួមសហការគ្នាកសាងឡើង ក្នុងការបម្រើវិស័យសាសនា ទៅតាមពុទ្ធានុញ្ញាតក្នុងទីវត្តព្រះក្រាលនេះ៕ រតនា

ប្រភព៖ រដ្ឋបាលខេត្តសៀមរាប