នាថ្ងៃពុធ ទី៦ ខែវិច្ឆិកា ឆ្នាំ២០១៩ ក្រោមកិច្ចសហការរៀបចំពីក្រសួងកិច្ចការនារី នៅសាលាឃុំទំព័រមាស ស្រុកសំរោង ទង ខេត្តកំពង់ស្ពឺ មានបើកវេទិកាក្រោមប្រធានបទ " លើកកម្ពស់ការ
ចូលរួមរបស់អ្នកម្តាយ ដើម្បីទប់ស្កាត់ការប្រើប្រាស់ និងចែកចាយគ្រឿងញៀន" ក្រោមអធិបតីភាពលោកជំទាវឡុង សុផល្លី អនុរដ្ឋលេខាធិការ និងជាអនុប្រធានក្រុមការងារប្រយុទ្ធប្រឆាំងគ្រឿងញៀនក្រសួងកិច្ចការនារី ដោយមានការអញ្ជេីញចូលរួមពីឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តានីតិសម្បទា នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនតំណាងស្រុក ឃុំ ភូមិ និងប្រជាពលរដ្ឋចូអលរួមសរុប១៥០នាក់។
លោក កង ប៊ុនណាត អភិបាលរង តំណាងគណកម្មាធិការត្រួតពិនិត្យគ្រឿងញៀនស្រុកសំរោងទង បានមានប្រសាសន៍ស្វាគមន៍ និងរបាយការណ៍ ពីការរីកចម្រេីនរបស់ស្រុកការងារប្រយុទ្ធប្រឆាំងគ្រឿងញៀងក្នុងស្រុក បានបញ្ជាក់ថាស្រុកមិនមែនជាទីតាំងផលិត ដាំដុះ គ្រឿងញៀនឡេីយ។
ថ្លែងក្នុងនាមនាយឧត្តមសេនីយ៍ មាស វិរិទ្ធ ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានប្រសាសន៍ថ្លែងអំណរគុណដល់ក្រសួងកិច្ចការនារី ហេីយការចូលរួមរបស់ម្តាយ ក្នុងការងាប្រយុទ្ធប្រឆាំងគ្រឿងញៀនគឺជាភាពសំខាន់ចាំបាច់ណាស់ព្រោះម្តាយគឺជាមនុស្សសំខាន់នៅជិតនិងមានឥទ្ធិពលលេីកូនចៅ សំដីអ្នកម្តាយប្រៀបដូចជាឱសថទិព្វព្យាបាលបញ្ហាគ្រប់យ៉ាងរបស់កូនចៅ។
ក្នុងឱកាសនោះ លោកជំទាវ ឡុង សុផល្លី អនុរដ្ឋលេខាធិការ បានថ្លែងថា គោលបំណងសំខាន់នៃវេទិកាគឺដេីម្បីអប់រំផ្សព្វផ្សាយដល់បងប្អូនប្រជាពលរដ្ឋដើម្បីឲ្យបានយល់ដឹងពីផលប៉ះពាល់នៃការប្រើប្រាស់ និងចែកចាយគ្រឿងញៀន ព្រមទាំងកៀរគរការចូលរួមបងប្អូនប្រជាពលរដ្ឋទាំងអស់ រួមគ្នាដើម្បីទប់ស្កាត់ ឈានទៅការលុបបំបាត់ការប្រើប្រាស់ និងចរាចរណ៍គ្រឿងញៀននៅក្នុងសហគមន៍របស់យើង។
ក្នុងឱកាសនោះដែរ លោកជំទាវ ឡុង សុផល្លី បា នថ្លែងបន្ថែមថា អ្នកប្រើប្រាស់គ្រឿងញៀន អាចបំផ្លាញទ្រព្យសម្បត្តិកិត្តិយសគ្រួសារខ្លួនឯង និងសង្គម ហ៊ានប្រព្រឹត្តបទល្មើសផ្សេងៗ ដែលធ្វើឱ្យប៉ះពាល់ដល់សន្តិសុខ សណ្តាប់ធ្នាប់សង្គមយ៉ាងធ្ងន់ធ្ងរ ដោយគ្មានស្គាល់បុណ្យបាបអ្វីឡើយ និងសំណូមពរដល់អ្នកពាក់ព័ន្ធ និងប្រជាពលរដ្ឋទាំងអស់ ត្រូវឆ្លើយថា “ទេ ចំពោះគ្រឿងញៀន”ហើយត្រូវចូលរួមឲ្យបានសកម្មគ្រប់ពេលវេលា ដើម្បីរក្សាការពារបាននូវសុខសន្តិភាព និងការអភិវឌ្ឍន៍ជូនសហគមន៍ឱ្យបានស្ថិតស្ថេរ គង់វង្សតរៀងទៅ៕
ប្រភព៖ អគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន