សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានមានប្រសាសន៍លើកឡើងថា ក្នុងនាមរាជរដ្ឋាភិបាលកម្ពុជា នឹងបន្តពង្រឹងកិច្ចសហប្រតិបត្តិការរួមគ្នាលើវិស័យសន្តិសុខ និងស្ថាប័នអនុវត្តច្បាប់នៃប្រទេសទាំងពី។ សម្តេចក្រឡាហោមបានលើកឡើងដូចនេះក្រោយជំនួបពិភាក្សាការងារជាមួយឯកឧត្តម W.Patrick Murphy ឯកអគ្គរដ្ឋទូតថ្មី សហរដ្ឋអាមេរិកប្រចាំកម្ពុជា នាទីស្តីការក្រសួងមហាផ្ទៃ នៅព្រឹកថ្ងៃសុក្រ ទី០៨ ខែវិចិ្ឆកា ឆ្នាំ២០១៩នេះ។ សម្តេចក្រឡាហោម មានប្រសាសន៍បន្តថា ស្របក្នុងឱកាសការប្រារព្ធខួបអនុស្សាវយ៍៧០ឆ្នាំ រវាងកម្ពុជា និងសហសរដ្ឋអាមេរិកនាពេលខាងមុខ កម្ពុជានឹងខិតខំរិះរកនូវកម្មវិធីល្អៗ ដើម្បីសំដែងឲ្យឃើញអំពីទំនាក់ទំនងដល់យូរអង្វែងរវាងប្រទេសទាំងពីរបន្ថែមទៀត។ ជាមួយគ្នានោះដែរ ក្នុងនាមរាជរដ្ឋាភិបាលកម្ពុជា សម្ដេចក្រឡាហោម ស ខេង បានថ្លែងអំណរគុណដល់រដ្ឋាភិបាលអាមេរិក តាមរយៈរដ្ឋមន្ដ្រីក្រសួងការបរទេស ដែលបានជូនពរដល់ប្រទេសកម្ពុជាក្នុងការប្រារព្ធបុណ្យឯករាជ្យជាតិ។
ឯកឧត្តម W.Patrick Murphy ឯកអគ្គរដ្ឋទូតថ្មី សហរដ្ឋអាមេរិកប្រចាំនៅកម្ពុជា ក៏បានលើកឡើងដែរថា បានឯកភាពចំពោះប្រសាសន៍របស់សម្តេចក្រឡាហោម ហើយសហរដ្ឋអាមេរិកនឹងបន្តពង្រឹងទំនាក់ទំនងល្អរវាងប្រទេសទាំងពីរលើផ្នែកសន្តិសុខ បទល្មើសផ្សេងៗឲ្យកាន់តែរីកចម្រើនបន្ថែមទៀតផងដែរ។ ឯកឧត្តមបានគូសបញ្ជាក់ដែរថា ក្នុងជំនួបនោះឯកឧត្តម និងសម្ដេចក្រឡាហោម បានពិភាក្សាគ្នាប្រកបដោយផ្លែផ្កា និងជិតស្និតជាទីបំផុត ហើយបានប្ដេជ្ញាចិត្តរួមគ្នា ពង្រឹងការអនុវត្តច្បាប់ ដើម្បីទប់ស្កាត់ការជួញដូរសត្វព្រៃ ការជួញដូរមនុស្ស ការការពារកុមារ និងការប្រយុទ្ធប្រឆាំងឧក្រិដ្ឋកម្មអន្ដរជាតិ ព្រមទាំងការងារមួយចំនួនទៀត។ ជាងនេះទៀតឯកឧត្តម ក៏បានថ្លែងអំណរគុណដល់ភាគីកម្ពុជាដែលបានអនុវត្តនូវកិច្ចសហប្រតិបត្តិការផ្ដល់នូវការការពារសន្តិសុខដល់ស្ថានទូតសហរដ្ឋអាមេរិក រួមទាំងមន្ត្រី បុគ្គលិកនៅក្នុងស្ថានទូតទាំងអស់កន្លងមកផងដែរ៕ គឹមអាន
ដោយ៖ នាយកដ្ឋានព័ត៌មានវិទ្យា
