នារសៀលថ្ងៃទី២៦ ខែកក្កដា ឆ្នាំ២០១៧ នៅទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតឱ្យគណៈប្រតិភូនៃគណៈមេធាវី នៃព្រះរាជាណាចក្រកម្ពុជា ចូលជួបសម្តែងការគួរសម និងគោរពរាយការណ៍ អំពីស្ថានភាពរបស់គណៈមេធាវី ។ ក្នុងឱកាសនោះដែរ លោកសួន វិសាល ប្រធានគណៈប្រតិភូនៃគណៈមេធាវី នៃព្រះរាជាណាចក្រកម្ពុជា បានធ្វើសេចក្តីគោរពរាយការណ៍ពីស្ថានភាពទូទៅ បញ្ហាផ្សេងៗដែលកើតមានឡើង គោរពជូន សម្តេចក្រឡាហោម ជ្រាប និងសំណូមពរដល់សម្តេច ជួយដល់គណៈមេធាវី លើបញ្ហាមួយចំនួនដូចជា៖
-ការអនុវត្តច្បាប់មិនទាន់ពេញលេញ ពិសេសមន្រ្តីនគរបាលយុត្តិធម៌
-ចង់ឱ្យមានការយល់និងចេះច្បាប់ចំពោះមន្ត្រីយុត្តិធម៌
-ទំហំរឿងព្រហ្មទណ្ឌកើតមានច្រើន តែថវិកាមានកម្រិត
-ខ្វះថវិកាក្នុងការជួយសង្គម ដូចជាករណីក្រុមហ៊ុនមួយចំនួនបានឆបោកប្រជាពលរដ្ឋ
-សិទ្ធិរបស់មេធាវីមិនទាន់ពេញលេញក្នុងការចូលទៅពន្ធនាគារ
- ទោសរដ្ឋប្បវេណី ត្រូវបាននគរបាលចាត់ទុកជារឿងព្រហ្មទណ្ឌ ធ្វើឱ្យប៉ះពាល់ដល់គណៈមេធាវី ដែលបានជួបប្រទះកន្លងមក។
ជាចុងបញ្ចប់នៃកិច្ចប្រជុំពិភាក្សានេះ សម្តេចក្រឡាហោម បានទទួលយកសំណូមពររបស់លោកប្រធាននៃគណៈមេធាវី និងបានផ្តល់មតិផ្តាំផ្ញើ ដល់គណៈមេធាវី នៃព្រះរាជាណាចក្រកម្ពុជា ដែលរកយុត្តិធម៌ជូនសង្គមថា មេធាវីទាំងអស់មិនត្រូវគិតរឿងប្រយោជន៍ផ្ទាល់ខ្លួននោះទេ បើភាគីណាត្រឹមត្រូវ សម្តេច ជួយការពារ បើមិនត្រឹមត្រូវទេ សម្តេចមិនការពារឡើយ៕