ព្រឹកថ្ងៃអង្គារ ទី២០ ខែសីហា ឆ្នាំ២០១៩ អគ្គាធិការដ្ឋាន ក្រសួងមមហាផ្ទៃ បានបើកកិច្ចប្រជុំពិភាក្សាលើរបាយការណ៍លទ្ធផលការងារអធិការកិច្ចចំនួន ០៦ ក្រោមអធិបតីភាព ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន ដោយមានការអញ្ជើញចូលរួម អគ្គាធិការរង ប្រធាននាយកដ្ឋាន អនុប្រធាននាយកដ្ឋាន និងមន្រ្តីជំនាញជាច្រើនផងដែរ។
របាយការណ៍ដែលលើកយកមកពិភាក្សាក្នុងកិច្ចប្រជុំនេះរួមមាន៖
- របាយការណ៍របស់ស្នងការនគរបាលខេត្តកំពង់ស្ពឺស្តីពីលទ្ធផលស្រាវជ្រាវ លើករណីលោកអធិការ០១រូប
- របាយការណ៍នៃលទ្ធផលចុះធ្វើអធិការកិច្ច ករណីភាពមិនប្រក្រតីក្នុងការអនុវត្តតួនាទី ភារកិច្ច របស់លោកស្នងការខេត្ត០១រូប
- របាយការណ៍នៃលទ្ធផលអង្កេតស្រាវជ្រាវ ករណីទីតាំងសង្វៀនជល់មាន់ ខណៈអាជ្ញាធរខេត្តមិនចាត់វិធានបង្រ្កាប តាមរយៈការចុះផ្សាយរបស់សារព័ត៌មាន កាលពីខែមេសា ឆ្នាំ២០១៩
- របាយការណ៍នៃលទ្ធផលចុះអង្កេតស្រាវជ្រាវ ករណីភាពមិនប្រក្រតីរបស់មន្រ្តីនៃនាយកដ្ឋានប្រឆាំងបទល្មើសសេដ្ឋកិច្ច ក្រសួងមហាផ្ទៃ ដែលកំពុងបម្រើការងារប្រចាំការក្នុងស្រុក១ នៅខេត្តឧត្តរមានជ័យតាមរយៈការចុះផ្សាយលើសារព័ត៌មានកាលពីខែកុម្ភៈ ឆ្នាំ២០១៩
- របាយការណ៍នៃលទ្ធផលចុះអង្កេតស្រាវជ្រាវ លើករណីនាយប៉ុស្តិ៍នគរបាល០១រូប នៅខេត្តឧត្តរមានជ័យ តាមរយៈការចុះផ្សាយលើសារព័ត៌មាន កាលពីខែឧសភា ឆ្នាំ២០១៩
- របាយការណ៍នៃលទ្ធផលចុះអង្កេតស្រាវជ្រាវ លើករណីមរណភាពរបស់ទណ្ឌិត០១រូប នៅពន្ធនាគារខេត្ត តាមការចុះផ្សាយរបស់សារព័ត៌មាន៕ គឹមអាន
ប្រភព៖ អគ្គាធិការដ្ឋាន