សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍លើកឡើ់ងថា បើទោះបីជាមានមតិរិះគន់ និងទាមទាឱ្យមានការលុបចោលនូវច្បាប់ស្តីពីសមាគម អង្គការមិនមែនរដ្ឋាភិបាល យ៉ាងណាក៏ដោយ ក៏រាជរដ្ឋាភិបាលកម្ពុជា នៅតែមានឆន្ទៈ ការប្តេជ្ញាចិត្តយ៉ាងមុតមាំ ក្នុងការបន្តលើកកម្ពស់កិច្ចសហប្រតិបត្តិការក្នុងភាពជាដៃគូជាមួយអង្គការសង្គមស៊ីវិល ក្នុងន័យដើម្បីរួមចំណែកអភិវឌ្ឍន៍សង្គមជាតិ។
សម្តេចក្រឡាហោម មានប្រសាសន៍បែបនេះក្នុងឱកាសអញ្ជើញជាអធិបតីក្នុងពិធីបើកសន្និបាតត្រួតពិនិត្យការងារ២០១៩ និងលើកទិសដៅការងារឆ្នាំ២០២០របស់ក្រសួងមហាផ្ទៃ នាទីស្តីការក្រសួង នៅថ្ងៃទី១៩ ខែកុម្ភៈ ឆ្នាំ២០២០។ សម្តេចក្រឡាហោម បានលើកឡើងថា បើប្រៀបធៀបទៅនឹងប្រទេសដទៃ ប្រទេសកម្ពុជាគឺជាឋានសួគ៌សម្រាប់អង្គការសង្គមស៊ីវិល។ ជាមួយគ្នានេះ សម្តេចក៏បានធ្វើការលើកទឹកចិត្តឱ្យគ្រប់ភាគីពាក់ព័ន្ធ ត្រូវមានការតាំងចិត្តខ្ពស់ អត់ធ្មត់ តស៊ូ ព្យាយាមបន្តធ្វើការពិនិត្យ ពិភាក្សាបន្តទៅទៀត ដើម្បីកសាងប្រទេសឱ្យស្ថិតនៅក្រោមនិតិរដ្ឋ។
គួរកត់សម្គាល់ដែលថា ក្នុងរយៈពេល១ឆ្នាំនេះក្រសួងមហាផ្ទៃ បានសម្រេចចុះបញ្ជីសមាគម អង្គការមិនមែនរដ្ឋាភិបាល និងសហគមន៍ចំនួន២៨៥ (សមាគមចំនួន ១៥៨, អង្គការមិនមែនរដ្ឋាភិបាលចំនួន ១១៥, និងសហគមន៍ចំនួន ១២) និងសម្រេចចិត្តលុបឈ្មោះចេញពីបញ្ជីចំនួន៣៨ (សមាគម១០ និងអង្គការមិនមែនរដ្ឋាភិបាល២៨)៕
ដោយ៖ នាយកដ្ឋានព័ត៌មានវិទ្យា